ՌԴ նախագահը շնորհավորել է Ուրախների և հնարամիտների ակումբին հոբելյանի կապակցությամբ

ՌԴ նախագահ Դմիտրի Մեդվեդևը շնորհավորել է Ուրախների և հնարամիտների ակումբի մասնակիցներին հայրենական հեռուստատեսության ամենավառ և հետաքրքիր ծրագրերից մեկի՝ ՈւՀԱ-ի ստեղծման 50-ամյակի կապակցությամբ, հաղորդում է «ՌԻԱ Նովոստին»՝ հղում անելով Կրեմլի կայքին:

«Մի խումբ տաղանդավոր հեղինակների կողմից ստեղծված ակումբը միավորեց տաղանդաշատ երիտասարդներին, ովքեր ունեն հումորի զգացում, լայն մտահորիզոն և բացառիկ մտածելու ունակություն: Զարմանալի չէ, որ հաղորդումը տարեցտարի ավելի մեծ հանրաճանաչություն էր վայելում: Այսօր Ուրախների և հնարամիտների ակումբը հազարավոր «ուրախ և հնարամիտ» ուսանողներ են և բուհերի շրջանավարտներ, ինչպես նաև նրանց հազարավոր երկրպագուները Ռուսաստանից, մերձավոր և հեռավոր արտասահմանից», - նշվում է շնորհավորական ուղերձում:

«Ուրախալի է, որ ակումբի բազմաթիվ «շրջանավարտներ» շարունակում են հաջող ստեղծագործական գործունեությունը հեռուստատեսությունում: Նրանք կյանքի են կոչում նոր նախագծեր, որոնք վայելում են հեռուստադիտողի համակրանքը», - մեջբերում է Մեդվեդևի խոսքերը մամուլի ծառայությունը:

Հաղորդումն առաջին անգամ հեռարձակվել է 1961 թ.-ի նոյեմբերի 8-ին: 1968 թ.-ին ՈւՀԱ-ն սկսեցին տեսագրել, մինչ այդ այն ուղիղ եթեր էր հեռարձակվում: 1971 թ.-ին ծրագիրը փակվեց ԽՍՀՄ պետական հեռուստատեսության և ռադիոյի ղեկավարության կողմից:

Վերածնված ՈւՀԱ-ի առաջին խաղը եթեր է դուրս եկել 1986 թ.-ի մայիսի 25-ին: Նրա հիմնադիրները դարձան նախկին խաղացողները: Հաղորդավարը Ալեքսանդր Մասլյակովն է:

ՈւՀԱ-ից են «դուրս եկել» Գենադի Խազանովը, Լեոնիդ Յակուբովիչը, Արկադի Խայտը, Արկադի Ինինը, Ալեքսանդր Կուրլյանդսկին, Յուլի Գուսմանը, Տատյանա Լազարևան, Վալդիս Պելշը, Միխայիլ Շացը, Օլեգ Ֆիլիմոնովը, Ալեքսեյ Կորտնևը, Ելենա Խանգան, Միխայիլ Մարֆինը, Նատալյա Գրոմուշկինան, Արտյոմ Տարասովը, Վլադիմիր Սեմագոն, Տիմուր Բատրուտդինովը, Միխայիլ Գալուստյանը, Գարիկ Մարտիրոսյանը և այլոք:-0-