Բժշկական ֆիզիկոսների որակավորման բարձրացման ԱՊՀ տարածաշրջանային կենտրոն կստեղծվի Մոսկվայում. Ռոսատոմ

Բժշկական ֆիզիկոսների որակավորման բարձրացման ԱՊՀ տարածաշրջանային կենտրոն կստեղծվի Մոսկվայում, չորեքշաբթի Երևանում լրագրողներին ասաց «Ռոսատոմ» պետկորպորացիայի գլխավոր տնօրենի տեղակալ Նիկոլայ Սպասկին:

Նրա խոսքով, նախագիծը քննարկվել է Հայաստանի մայրաքաղաքում անցկացված ԱՊՀ անդամ պետությունների խաղաղ նպատակով ատոմային էներգիայի օգտագործման կոմիտեի տասներկուերորդ նիստում:

«Բոլորս շատ լավ գիտենք, որ, ցավոք, փողն ամեն ինչ է լուծում : Ավելի դյուրին է ֆինանսավորում գտնել, քան բարձրորակ մասնագետներ պատրաստել: Այդ կենտրոնը չի լուծի բոլոր խնդիրները, բայց մենք այն դիտարկում ենք որպես ազդակ»,- ասաց Սպասկին:

Նրա խոսքով, կենտրոնի ստեղծման համար միջոցներն արդեն նախատեսված են: «Շատ կարևոր է, որ այն ստեղծվում է ՄԱԳԱՏԷ-ի հովանու ներքո և այդ կազմակերպության հետ համատեղ: Դա համոզվածություն է առաջացնում, որ կապահովվեն բոլոր չափանիշների համապատասխանությունը, ինչպես նաև ամենաբարձր պահանջները»,- ասաց «Ռոսատոմի» գլխավոր տնօրենի տեղակալը:

Սպասկու խոսքով, նիստում հավանություն է տրվել նաև վերջին մի քանի տարիների ընթացքում նախապատրաստած ատոմային էներգիայի խաղաղ օգտագործման բնագավառում ԱՊՀ անդամ-երկրների միջպետական հարաբերությունների համակարգման համաձայնագրի նախագծին:

«Ամեն ինչին միշտ կարելի է հոռետեսորեն վերաբերվել, ասել, թե դա համաձայնագրի հերթական նախագիծ է, բայց սա լուրջ, երկարաժամկետ նախագիծ է: Դրանում սահմանված են մեր համագործակցության գերակա թեմաները, ամրագրված են համագործակցության մեխանիզմները, այդ թվում՝ յուրաքանչյուր անդամ երկրի լիազոր մարմինների նշանակման մեխանիզմները, և դա շատ կարևոր է»,- նշեց Սպասկին:
Նա ավելացրեց, որ այժմ յուրաքանչյուր երկիր կանցնի այդ նախագծի համաձայնեցման ներքաղաքական ընթացակարգերին և այնուհետև սահմանված կարգով հաջորդ տարվա առաջին կիսամյակում նախագիծը կուղղվի Համագործակցության մարմիններին վերջնական հաստատման համար: -0-