Ռուսաստանը հարևան տարածաշրջաններից վերջնականապես դուրս մղել չի հաջողվի. ռուս փորձագետ

Ռուսաստանը հարևան տարածաշրջաններից վերջնականապես դուրս մղել չի հաջողվի, ասել է «Ռուսաստանը գլոբալ տնտեսությունում» ամսագրի գլխավոր խմբագիր Ֆյոդր Լուկյանովը՝ պատասխանելով որոշ արևմտյան ուժերի՝ Հարավային Կովկասից Ռուսաստանը դուրս մղելու վերաբերյալ հարցին:

«Հարավային Կովկասում, ինչպես ամենուր, ազդեցության և վարկանիշի մշտական խաղ է գնում, չեմ կարծում, թե Ռուսաստանին ընդհանրապես կարելի է «վերջնականապես դուրս մղել» հարևան տարածաշրջաններից, բայց «սպիտակ քարտ» էլ ոչ ոք երբեք չի տա: Կյանքը շարունակվում է»,- ասել է Լուկյանովը «Նովոստի-Արմենիա» գործակալությանը տված առցանց հարցազրույցում, որը կազմակերպել է Կովկասի Լրագրողների ցանցը:
Փորձագետը կարծում է, որ Ռուսաստանում ընթացող վերջին գործընթացների, մասնավորապես, նախագահի պաշտոնում Վլադիմիր Պուտինի առաջադրման կապակցությամբ, Ռուսաստանի արտաքին քաղաքական կուրսի փոփոխություններ չեն լինի Հարավային Կովկասում: 
Ինչ վերաբերում է Մեծ Մերձավոր Արևելքին, ապա, Լուկյանովի խոսքով, ռազմավարական տեսանկյունից Ռուսաստանն աստիճանաբար հեռանում է այնտեղից՝ անկախ նախագահից:

Հայաստանի և Ադրբեջանի լրագրողների համար փորձագետների, վերլուծաբանների և քաղաքական գործիչների հարցազրույցները երկու երկրներում հետաքրքրություն առաջացրած խնդիրների և գործընթացների շուրջ կազմակերպվում են «Հայ-ադրբեջանական երկխոսության այլընտրանքային տեղեկություն» նախագծի շրջանակներում:

Ռեգիոն Հետազոտական կենտրոնի (Հայաստան) և Խաղաղության ու ժողովրդավարության ինստիտուտի (Ադրբեջան) նախագծին օժանդակում են Բրիտանիայի դեսպանատները ՀՀ-ում և Ադրբեջանում: -0-