Օնիշչենկոն խոստովանել է, որ Ռուսաստանում ամենից շատ բժիշկներն են ծխում. թերթ
Ռուսների շրջանում ամենից շատ բուժհաստատությունների աշխատակիցներն են ծխում, հինգշաբթի «Կոմսոմոլսկայա պրավդա» թերթին տված հարցազրույցում խոստովանել է ՌԴ գլխավոր սանիտարական բժիշկ Գենադի Օնիշչենկոն։
«Խոստովանում եմ` մեր քաղաքացիների շջանում ամենաչարաշահող ծխողները բժիշկներն են։ Դա այլանդակություն է, ազգային խայտառակություն»,-ասել է Օնիշչենկոն, հաղորդում է «ՌԻԱ Նովոստին»։
Ըստ Օնիշչենկոյի՝ նշանակությամբ երկրորդ ազգային խայտառակությունը ծխախոտի արտադրանքի տեխնիկական կանոնակարգն է, որը «միջազգային ծխախոտի լոբբիի կողմից սանձարձակորեն, բռիությամբ լոբբիացվել է և ընդունվել մեր երկրում»։
«Ռուսաստանն ամենաթողության օազիսի է վերածվել, մեզ մոտ տարեկան 400 մլրդ հատիկ ծխախոտ է արտադրվում»,- նրա խոսքերը մեջբերում է «Կոմսոմոլսկայա պրավդան»։
Օրերս ՌԴ առողջապահության և սոցիալական զարգացման նախարարությունն օրինագիծ է մշակել, որի համաձայն` առաջիկա տարիներին երկրում ծրագրվում է լիովին արգելել ծխելը հասարակական տրանսպորտում, շքամուտքերում, սրճարաններում և գիշերային ակումբներում, ինչպես նաև սահմանափակել ծխախոտի վաճառքն ու գովազդը և բարձրացնել ակցիզի արժեքը։
«Այդ օրինագիծը հուսահատ քայլ է և միաժամանակ քաղաքացիական արիության ակտ։ Այն այլընտրանք է տեխնիկական կանոնակարգին, որը փաստորեն պաշտպանում է ծխախոտ արտադրողների շահերը։ Եվ պետք չէ գուշակի մոտ գնալ, որպեսզի կանխագուշակես, թե ինչպիսի կատաղի դիմադրություն կլինի նոր օրենքի ընդունման համար»,- պարբերականին տված հարցազրույցում նշել է Օնիշչենկոն։ -0-
