Չորս ամիս անընդմեջ հիվանդության պատճառով բացակայած ռուս պաշտոնյաները կազատվեն. օրենք
ԵՐԵՎԱՆ, 29 հունիսի. /Նովոստի-Արմենիա/. ՌԴ նախագահ Դմիտրի Մեդվեդևն օրենք է ստորագրել, ըստ որի՝ պետպաշտոնյաները կարող են ազատվել ծառայությունից, եթե ծառայության ընթացքում հիվանդության պատճառով բացակայել են չորս ամիս անընդմեջ, հաղորդում է «ՌԻԱ Նովոստին»՝ հղում անելով Կրեմլի մամուլի ծառայությանը։
Օրենքն ընդունվել է հունիսի 17-ին Պետական Դումայի կողմից և հավանության արժանացել Ֆեդերացիայի Խորհրդի կողմից 2011 թվականի հունիսի 22-ին։ Այն փոփոխություններ է կատարում «ՌԴ պետական քաղաքացիական ծառայության մասին» օրենքում։
Օրենքը նոր հիմք է դնում գործատուի նախաձեռնությամբ պետպաշտոնյաների հետ ծառայողական պայմանագրի լուծարման համար։ Պայմանագիրը կարող է լուծվել, իսկ պաշտոնյան՝ ազատվել պաշտոնից, եթե նա բացակայում է ծառայությունից չորս ամիս անընդմեջ ժամանակավոր անաշխատանքունակության պատճառով։ Սակայն նա չի կարող ազատված լինել, եթե օրենսդրությունն աշխատատեղի պահպանման ավելի երկար ժամանակ է նախատեսում որոշակի հիվանդության դեպքում կամ եթե որոշ կատեգորիայի քաղաքացիների համար պաշտոնի պահպանման երաշիքներ են սահմանված։ -0-
