Ապրիլին Մոսկվայում փրկագին ստանալու նպատակով ձեռնարկատիրոջը առևանգելու կասկածանքով երեք հոգու են ձերբակալել, չորեքշաբթի հաղորդում է ՌԻԱ Նովոստին՝ հղում անելով ՌԴ քննչական կոմիտեին (ՔԿ)։
Ըստ հետաքննության տվյալների, 2011թ.-ի ապրիլի 29-ին չորս տղամարդ Մոսկվայի Բերզարինա փողոցում հարձակվել են առևտրական ֆիրմայի տնօրենի վրա, նրան տարել են Տվերի շրջան, որտեղ մասնավոր տանն են պահել։ ԱՅնուհետև կասկածյալները պահանջ են ներկայացրել նրա գործընկերներին 20 մլն ռուբլի փոխանցելու վերաբերյալ, որպեսզի ազատ արձակեն ձեռնարկատիրոջը։
Բանակցություններից և պահանջված գումարը փոխանցելու խոստումից հետո տուժածին բաց են թողել, և նա դիմել է իրավապահ մարմիններին։
«Գրագետ կազմակերպված և պրոֆեսիոնալ կերպով անցկացված քննչական գործողությունների և օպերատիվ հետախուզական միջոցառումների շնորհիվ, հաստատվել են բոլոր կասկածյալները և նրանց բնակության վայրը։ Նրանք են՝ ՌԴ գործազուրկ քաղաքացիներ՝ Հովսեփ Սարգսյանը, Աշոտ Ֆարկադյանը, ինչպես նաև ՀՀ քաղաքացի Արծրուն Սարգսյանը, ովքեր 2011թ.-ի մայիսի 31-ին ձերբակալվել էին Մոսկվայում»,- ասվում է հաղորդագրության մեջ։
Գերատեսչությունը պարզաբանում է, որ քրեական գործ է հարուցվել ՌԴ ՔՕ 126-րդ (առևանգում), ՌԴ ՔՕ 127-րդ ( ազատությունից ապօրինաբար զրկել) և ՌԴ ՔՕ 163-րդ (դրամաշորթություն) հոդվածներով։ Այժմ որոշվում է նրանց մեղադրանքի երկարացման և պատժամիջոցների ընտրության վերաբերյալ հարցը։ ՔՕ 126-րդ հոդվածով մինչև 20 տարի ազատազրկում է նախատեսում: -0-
