Գորբաչյովն 80-ամյակը կնշի Մոսկվայում և Լոնդոնում

ԵՐԵՎԱՆ, 2 մարտի. /Նովոստի-Արմենիա/. ԽՍՀՄ նախկին նախագահ Միխայիլ Գարբաչյովը, ում անձը ժամանակակիցները տարբեր կերպ են գնահատում, իր 80-ամյակը կնշի Մոսկվայում՝ ընտանիքի և ընկերների շրջապատում, «ՌԻԱ Նովոստիին» է հայտնել «Գորբաչյով-հիմնադրամի» աշխատակցուհին։

Նրա խոսքերով՝ ցանկացողները կարող են Գորբաչյովին շնորհավորել ավելի ուշ Լոնդոնում՝ քաղաքական գործչի հոբելյանին նվիրված պատմական համաժողովի և ժամանակակից քաղաքակրթության զարգացման գործում ունեցած ավանդի համար նոր մրցանակի հանձնման արարողության ժամանակ։

Հիմնադրամի աշխատակցուհին նշել է նաև, որ մարտի 15-ին «Գորբաչյով- հիմնադրամում» կբացվի քաղաքական գործչի 80-ամյակին նվիրված «Գորբաչյովի սերունդը. վաթսունականները երկրի կյանքում» համաժողովը, որին կմասնակցի և ինքը՝ հոբելյարը։

Հիմնադրամի տեղեկատվությամբ՝ համաժողովը հարթակ կդառնա 20-րդ դարի երկրորդ կեսին հայրենական պատմության մեջ «վաթսունականների» դերի, ժամանակակից Ռուսաստանում նրանց գաղափարների և արժեքների քննարկման համար։ -0-