ԱՊՀ երկրների մշտական քաղաքական ներկայացուցիչները կքննարկեն Համագործակցության հոբելյանի նախապատրաստման հարցերը

ԱՊՀ երկրների մշտական քաղաքական ներկայացուցիչների խորհրդի և ԱՊՀ տնտեսական խորհրդին առընթեր տնտեսական հարցերով հանձնաժողովի համատեղ նիստը տեղի կունենա փետրվարի 25-ին Մինսկում գտնվող ԱՊՀ գործկոմում, «ՌԻԱ Նովոստիին» տեղեկացրել են կազմակերպության մամուլի ծառայությունից:

Նիստի մասնակիցները կքննարկեն ԱՊՀ 20-ամյակին նվիրված 36 միջոցառումների նախապատրաստման հարցերը: Օրակարգի առանձին կետով կքննարկվի «ԱՊՀ-ն 20 տարեկան է» միջպետական ցուցահանդեսի անցկացման հարցը: Ցուցահանդեսը կկազմակերպվի 2011 թ.-ի հունիսի 28-ից-հուլիսի 3-ը Համառուսաստանյան  ցուցահանդեսային կենտրոնում:

Ցուցահանդեսի շրջանակներում նախատեսվում է անցկացնել ԱՊՀ մասնակից-պետությունների արդյունաբերական անվտանգության բարձրացմանը նվիրված միջազգային գիտագործնական կոնֆերանս, թեմատիկ «կլոր սեղաններ», «Երիտասարդ սերունդ. կյանք առանց սահմանների» հումանիտար համաժողովը, մշակութային և ժողովրդական ավանդույթներին նվիրված փառատոն:

Քաղաքական ներկայացուցիչների նիստին կմասնակցի ԱՊՀ գործկոմի նախագահ-գործադիր քարտուղար Սերգեյ Լեբեդևը:

Ադրբեջանը, Հայաստանը, Բելառուսը, Ղազախստանը, Ղրղզստանը, Մոլդովան, Ռուսաստանը, Տաջիկստանը, Թուրքմենստանը, Ուզբեկստանը և Ուկրաինան միավորող ԱՊՀ-ում ստեղծվել է 82 աշխատանքային մարմին, այդ թվում՝ ոլորտային համագործակցության 66 մարմին:-0-