ԵՐԵՎԱՆ, 31 հունվարի. /Նովոստի-Արմենիա/. Ռուսաստանում գեղարվեստական գրականություն չի կարդում երիտասարդության ավելի քան 30 տոկոսը, իսկ թերթեր և ամսագրեր՝ ավելի քան 20 տոկոսը, ասվում է «Երիտասարդությունը Ռուսաստանում» վիճակագրական հավաքածուի նյութերում, որը հրատարակվել է Ռոսստատի և ՅՈՒՆԻՍԵՖ ՄԱԿ մանկական հիմնադրամի հետ համատեղ և ներկայացվել երկուշաբթի ՌԻԱ Նովոստիում։
Տվյալները ներկայացվում են 2009 թվականին Պետական ծառայության ռուսական ակադեմիայի սոցիոլոգիական կենտրոնի երիտասարդության մշակութային կարիքների ընտրողական ուսումնասիրության հիման վրա ՌԴ ութ սուբյեկտներում։ Հարցվածների թիվը կազմել է 15-ից 29 տարեկան հասակի 1050 հազար մարդ։
Ուսումնասիրության համաձայն, երիտասարդության 31,2 տոկոսը չի կարդում գեղարվեստական գրականություն։ Դրա ընթերցանությանն է շաբաթական մոտ մեկ ժամ տրամադրում երիտասարդների 13,7 տոկոսը, շաբաթական մինչև չորս ժամ՝ 12,3 տոկոսը, օրական մինչև մեկ ժամ՝ 19,3 տոկոսը, օրական մեկ ժամ և ավելի՝ 23,2 տոկոսը։
Միաժամանակ թերթեր և ամսագրեր չի կարդում երիտասարդության 22,7 տոկոսը։
ՌԴ թանգարաններ չի այցելում երիտասարդների 45,4 տոկոսը, թատրոններ՝ 46,8 տոկոսը, ակումբներ և դիսկոտեկներ՝ 39,1 տոկոսը։ Կինոթատրոնները մեծ մասսայականություն են վայելում ռուս երիտասարդության շրջանում՝ կինոթատրոններ չի գնում հարցվածների միայն 18,1 տոկոսը։ -0-
