Ռուսաստանի հայերի միությունը (ՌՀՄ) խորապես ցնցված է Մոսկվայի «Դոմոդեդովո» օդանավակայանում տեղի ունեցած ահաբեկչական ակտի մասին տեղեկությունից, որը տարբեր ազգությունների և դավանքի մարդկանց մահվան պատճառ է դարձել:
Պայթյունը տեղի է ունեցել Մոսկվայի ժամանակով ժամը 16։32-ին Դոմոդեդովո օդանավակայանի միջազգային թռիչքների սրահում։ Ըստ նախնական տվյալների՝ ռումբի հզորությունը կազմել է մոտ 5 կգ տրոտիլային համարժեքով։ Նախնական տվյալներով՝ զոհվել է 35 մարդ:
«Անկեղծ ցավակացություն ենք հայտնում զոհվածների հարազատներին և մտերիմներին, ինչպես նաև կարեկցանք ենք հայտնում այդ բարբարոսական ակցիայից տուժածներին»,- նշվում է չորեքշաբթի «Նովոստի-Արմենիա» գործակալություն ստացված կազմակերպության հայտարարության մեջ:
ՌՀՄ-ն, ինչպես և բազմազգ Ռուսաստանի քաղաքացիական հասարակության այլ կառույցները, ակտիվորեն օգնություն և աջակցություն է ցուցաբերում տուժածներին: «Մենք կիսում ենք տեղի ունեցած իրադարձություններին երկրի ղեկավարության գնահատականը, որը ևս մեկ գրոհ էր՝ ուղղված ռուս ժողովրդի միասնության ձախողմանն ու մեր պետության փլուզմանը», - նշվում է հայտարարության մեջ:
ՌՀՄ-ում կարծում են, որ հունվարի 24-ի դեպքերը բացահայտ կերպով ցույց տվեցին, որ անթույլատրելի է մեր հասարակությանը սպառնացող վտանգների և մարտահրավերների նկատմամբ հանդուրժողականությունն ու ոչ համարժեք գնահատկանը՝ անկախ այն բանից, թե որ կողմից են նրանք ծագում: «Ժամանակն է զգալիորեն բարձրացնել պահանջկոտությունն ու պատասխանատվությունը երկրի պետական կառավարման բոլոր օղակներում: Ստեղծված պայմաններում անթույլատրելի է ենթարկվել սադրանքների, հարկավոր է դրսևորել ինքնազսպում և համախմբվածություն, որոնք բազմազգ Ռուսաստանի հետագա ամրապնդման և զարգացման կարևոր նախադրյալներից են», - հայտարարում է ՌՀՄ-ն:-0-
