Պուտինը հուսով է, որ 2011թ.-ին ՌԴ-ն էներգետիկ խնդիրներ չի ունենա ԱՊՀ գործընկերների հետ

ՌԴ վարչապետ Վլադիմիր Պուտինը հույս ունի, որ Ռուսաստանն ԱՊՀ գործընկերների հետ 2011թ.-ն առանց էներգետիկ խնդիրների կդիմավորի։

«Այսօր մենք բոլոր գործընկերների հետ պայմանավորվածություն ունենք, որ մենք աշխատելու ենք ձեռք բերված համաձայնագրերի շրջանակներում, գործող պայմանագրերը ստորագրվել են և իրագործվել են, հուսով եմ, որ այդպես էլ կշարունակվի»,- լրագրողներին ասաց ՌԴ կառավարության նախագահը։

Պուտինը հիշեցրեց, որ էներգետիկայի շուրջ բանակցություններում Ռուսաստանը շատ հարցերում զիջումների է գնացել Բելառուսի և Ուկրաինայի գործընկերների նկատմամբ։ «Դա ոչ քիչ գումար արժեցավ»,- ասաց Պուտինը։ Միաժամանակ նա ավելացրեց, որ ապագայում նույնպես  աշխատանքի տարբեր տարբերակներ են քննարկվելու։

Նա հիշեցրեց առաջարկը, որն արել էր ուկրաինական կողմը՝ «Գազպրոմ»-ի և «Նավթոգազ»-ի համախմբման վերաբերյալ։ «Չեմ կարծում, որ դա անարժեք գաղափար է, այո, ԱԲԸ-ն փոքրամաս բաժնետեր կլինի, բայց այն բարեբախտաբար խոշոր համաշխարհային ընկերություն կլինի, որն իր ձայնը կունենա և ընդհանուր առմամբ կկարողանա մասնակցել ընդհանուր աշխատանքում, դա անիմաստ չէ»,- լրագրողներին ասաց Պուտինը։

Վերջին տարիներին ռուսական և ուկրաինական կողմերի միջև առևտրային տարաձայնությունները հանգեցրել են նրան, որ ընդհատվել է «երկնագույն վառելիքի» մատակարարումը եվրոպացի սպառողներին 2005-2006թթ.-ին և 2009թ.-ի հունվարին։ Միաժամանակ հիմնական վիճելի հարցը գինն է եղել։ Ուկրաինայիում նոր նախագահ Վիկտոր Յանուկովիչի իշխանության գալուց հետո փոխզիջում է գտնվել՝ «Նավթոգազ»-ը ռուսական գազի համար պայմանագրային գնից 30 տոկոսի չափով զեղչ է ստացել, Ղրիմում ՌԴ Սևծովյան նավատորմի տեղակայման ժամկետը 25 տարով երկարացվել է։ -0-