Հինգշաբթի Մոսկվայում ՀԱՊԿ-ի Արտգործնախարարների խորհրդի, Պաշտպանության նախարարների խորհրդի և Անվտանգության խորհուրդների քարտուղարների կոմիտեի համատեղ նիստ կանցկացվի, «Նովոստի-Արմենիա» գործակալությանը տեղեկացրել է ՀԱՊԿ-ի մամուլի քարտուղար Վլադիմիր Զայնետդինովը:
Տեղեկատվության համաձայն՝ նիստի ընթացքում կքննարկվի ՀԱՊԿ Հավաքական անվտանգության խորհրդի հերթական նստաշրջանի օրակարգը, ճգնաժամային արձագանքման համակարգի արդյունավետության բարձրացմանը, հավաքական անվտանգության ուժերի կարգավիճակին և համակարգի միջոցներին, ռազմատնտեսական համագործակցությանը վերաբերող հարցերի վերաբերյալ փաստաթղթերի նախագծերը:
Բացի այդ կքննարկվեն ռազմական և ռազմատեխնիկական համագործակցության, տեղեկատվական անվտանգության և այլ ոլորտներում Կազմակերպության գործունեությունը կանոնակարգող փաստաթղթերի նախագծերը:
«Ճգնաժամային արձագանքման համակարգի կատարելագործմանը վերաբերող փոփոխություններ են մտցվում Հավաքական անվտանգության պայմանագրի, Կազմակերպության կանոնադրության, Ընթացակարգի կանոնների, ՀԱՊԿ-ի մարմինների մասին դրույթների մեջ: Ներկայացվւ նաև ամբողջովին նոր փաստաթուղթ՝ ՀԱՊԿ-ի ճգնաժամային իրավիճակների արձագանքման կարգի մասին դրույթը», - նշել է Զայնետդինովը:
Նա տեղեկացրել է, որ քննարկվող փաստաթղթերի թվում են այս կամ այն գործողությունների իրականացման պայմանենրում Արագ արձագանքման հավաքական ուժերի (ԱԱՀՈՒ) կարգավիճակն ու օգտագործումը սահմանող համաձայնագրերի նախագծերը:
«Ամրագրված նորմերը թույլ կտան կարգավորել սահմանի հատման և այլ պետություններում ուժերի տեղակայման հարցերը, հնարավոր ծառայությունների տրամադրման և ընդունող կողմից այդ ուժերը մատակարարելու հարցերը, ուր ՀԱՊԿ Հավաքական անվտանգության խորհրդի որոշմամբ մեկնում են ԱԱՀՈւ-ի ստորաբաժանումները որևէ գործողություն իրականացնելու համար», - նշել է ՀԱՊԿ-ի մամուլի քարտուղարը:
Նա ավելացրել է, որ համապատասխան իրավանորմատիվային փաստաթղթերի ընդունումը թույլ կտա ՀԱՊԿ անդամ-պետություններին ավելի արդյունավետ և օպերատիվ կերպով արձագանքել ճգնաժամային իրավիճակների զարգացմանը:
Փոփոխությունները մշակվել են այս տարվա հունիսին Ղրղզստանի Հանրապետությունում տեղի ունեցած հայտնի ողբերգական իրադարձություններից հետո՝ Երևանում 2010 թ.-ի օգոստոսի 20-ին կայացած ՀԱՊԿ անդամ-պետությունների ղեկավարների ոչ պաշտոնական հանդիպման ժամանակ ձեռք բերված պայմանավորվածությունների համաձայն:
Պետությունների ղեկավարները պետք է ընդհանուր առմամբ քննարկեն փաստաթղթերի երեք փաթեթ:-0-
