ՀԱՊԿ-ը ճգնաժամային իրավիճակներին արձագանքելու լրացուցիչ մեխանիզմներ է մշակում
ՀԱՊԿ ԱԽ աշխատակազմերի ներկայացուցիչները խորհրդակցությունների ժամանակ պաշտպանել են իրավանորմատիվային բազայի կատարելագործման և ՀԱՊԿ-ում ճգնաժամային իրավիճակներին արձագանքելու լրացուցիչ մեխանիզմների ստեղծման անհրաժեշտության մասին առաջարկը, հինգշաբթի հաղորդում է Հայաստանում ՀԱՊԿ տեղեկատվական աջակցության միջազգային հասարակական կենտրոնի ազգային ներկայացուցչությունը:
Խորհրդակցությունները տեղի են ունեցել երեքշաբթի՝ ՀԱՊԿ Գլխավոր քարտուղարի տեղակալ Արա Բադալյանի նախագահությամբ, որոնց նպատակն էր մշակել ճգնաժամային արձագանքման համակարգի կատարելագործմանն ուղղված ընդհանուր մոտեցումներ և քննարկել Կազմակերպության սահմանադիր և իրավանորմատիվային փաստաթղթերում համապատասխան փոփոփոխություններ կատարելու առաջարկները:
Խորհրդակցություններին մասնակցել են նաև ՀԱՊԿ անդամ-պետությունների լիիրավ ներկայացուցիչները:
«Խորհրդակցությունների մասնակիցները տեղեկատվություն են փոխանակել ՀԱՊԿ ճգնաժամային արձագանքման համակարգի արդյունավետության բարձրացման հարցերի շուրջ կողմերի դիրքորոշումների մասին և առաջարկներ են ներկայացրել Կազմակերպության գործունեությունը կարգավորող իրավական փաստաթղթերի սրբագրման կապակցությամբ», - նշվում է տեղեկատվության մեջ:
Ղազախստանի Հանրապետությունն առաջարկել է ապահովել այն հարցերի առաջնահերթ քննարկումը, որոնք կապված են Հավաքական անվտանգության պայմանագրում և ՀԱՊԿ կանոնադրությունում փոփոխություններ ու լրացումներ կատարելու հետ, ինչպես նաև այլ փաստաթղթեր, որոնք բխում են այդ լրացումների և փոփոխությունների կատարման անհրաժեշտությունից:
ՀԱՊԿ քարտուղարությունը ճգնաժամային արձագանքման փաստաթղթերի նախագծերի փաթեթ է պատրաստել, որն արդեն ներկայացվել է ՀԱՊԿ անդամ-պետությունների քննարկմանը:
Ամփոփվել է նաև այլ միջազգային կազմակերպություններում ճգնաժամային արձագանքման համակարգի մասին նյութը: ՀԱՊԿ անդամ-պետություններին ներկայացված ճգնաժամային արձագանքման մասին փաստաթղթերի փաթեթը կքննարկվի 2010 թ.-ի սեպտեմբեր-հոկտեմբերին կայանալիք խորհրդակցությունների ժամանակ:-0-
