ԵՐԵՎԱՆ, 6 օգոստոսի. /Նովոստի-Արմենիա/. Համաշխարհային պարենային շուկաներում գրանցված գների աճը, որի պատճառն է հացահատիկի արտահանումը ժամանակավորապես արգելելու Ռուսաստանի որոշումը, բացասաբար կազդի Թուրքիայի վրա, որը ռուսական հացահատիկի առաջատար ներկրողներից է, ուրբաթ տեղեկացնում են տեղական ԶԼՄ-ները՝ հղում անելով փորձագետների կարծիքին:
Ռուսաստանում երաշտի և հատիկավոր կուլտուրաների բերքի կրճատմանը հանգեցրած անոմալ շոգ եղանակի պատճառով վարչապետ Վլադիմիր Պուտինը որոշում է կայացրել օգոստոսի 15-ից մինչև դեկտեմբերի 31-ը արգելել հացատահաիկի արտահանումը:
Թուրքիայի գյուղատնտեսության նախարար Մեհդի Էկերը տեղեկացրել է, որ Թուրքիայի հացահատիկի պաշարներն այժմ կազմում են մոտավորապես 2,2 միլիոն տոննա: «Շարունակվում է հատիկավոր կուլտուրաների բերքահավաքը, մենք հացահատիկի պահանջարկի բավարարման հետ կապված խնդիրներ չունենք», - նախարարին մեջբերում է «Պոստա» թերթը, հաղորդում է «ՌԻԱ Նովոստին»:
Միաժամանակ փորձագետները մտավախություն ունեն, որ արտերկրի պարենային շուկաներում առաջացած խուճապը կարող է դրդել սպեկուլյանտներին բարձրացնել հացահատիկի գները:
«Հենց նվազեն հացահատիկի բերքահավաքի տեմպերը, սպեկուլյանտները կօգտվեն իրավիճակից՝ գները բարձրացնելու համար», - մեջբերում է «Պոստան» Թուրքիայի գյուղատնտեսական ինժեներների պալատի ղեկավար Գեկխան Գյունայդինին:
Նմանատիպ կարծիքի է «Ուն Սանայի» ալրաղացային ընկերության ղեկավար Իլհան Ջավջան:
«Այժմ հացահատիկի գինը, որը մենք ներկրում ենք մեկ տոննայի դիմաց 210 դոլարով, հասել է 290-300 դոլարի: Համաշխարհային մասշտաբով դա նշանակում է, որ հացահատիկի գները 25 տոկոսով ավելացել են: Մենք չենք ցանկանում, որպեսզի այդ աճը ազդի պատրաստի արտադրանքի գների վրա», - մեջբերում է գործարարին տեղական հեռոuստատեսությունը:-0-
