Մոսկվայում անչափահաս մայրերի համար սոցհաստատություններ կհայտնվեն 2010թ.-ի աշնանը

Անչափահաս մայրերի համար «Փոքրիկ մայրիկ» պետական հաստատություն կստեղծվի 2010թ.-ի աշնանը Մոսկվայում, լրագրողներին հայտնեց մայրաքաղաքի ընտանեկան և երիտասարդական քաղաքականության դեպարտամնետի ղեկավար Լյուդմիլա Գուսևան, հաղորդում է «ՌԻԱ Նովոստին»:

«Մենք կստեղծենք հաստատություն, որտեղ կկարողանան գտնվել անչափահաս մայրերը, որոնց ծնողները հրաժարվել են նրանց տուն ընդունել երեխայի հետ»,- ասաց Գուսևան:

Ըստ նրա` հաճախ անչափահաս աղջիկների ծնողները ստիպում են նրանց ազատվել երեխայից, այն դեպքում, երբ իրենք՝ ապագա մայրերը,   ցանկանում են ծննդաբերել:

«Այժմ քաղաքում մեզ մոտ հատուկ հաստատություն չկա նման երիտասարդ մայրերի համար: Ենթադրվում է, որ մայրերը նոր հաստատությունում կկարողանան սննունդ ստանալ և անվճար բնակվել երեխայի հետ»,- նշեց դեպարտամենտի ղեկավարը:

Նա ավելացրեց, որ քաղաքի իշխանությունները կհետևեն, որպեսզի բոլոր երիտասարդ մայրերը, ովքեր եկել են այդ հաստատություն, աշխատեն և սովորեն: -0-