ԵԱՀԿ մասնակից երկրներն աջակցել են կազմակերպությունում նախագահավող Ղազախստանի նախաձեռնությանը՝ 2010թ.-ին Աստանայում ԵԱՀԿ գագաթնաժողով անցկացնելու մասին, հայտնեց կազմակերպության գործող նախագահ, Ղազախստանի ԱԳՆ ղեկավար- պետքարտուղար Կանատ Սաուդաբաևը, հաղորդում է «ՌԻԱ Նովոստին»։
«Այսօր մենք համաձայնության եկանք Աստանայում մինչև տարեվերջ ԵԱՀԿ գագաթնաժողով անցկացնելու անհրաժեշտության մասին, տա Աստված, տարեվերջին ուրախ կլինենք տեսնել Ձեզ Աստանայ»,- ասաց նա՝ շաբաթ օրը Ալմաթիում ելույթ ունենալով ԵԱՀԿ երկրների ԱԳՆ ղեկավարների ոչ պաշտոնական հանդիպմանը։
Ըստ նրա՝ գագաթնաժողովի հստակ ժամկետի համաձայնեցումը ԵԱՀԿ մշտական խորհրդի իրավասությունն է։ Բացի այդ, մշտական խորհուրդը կպատրաստի անհրաժեշտ քաղաքական փաստաթղթերը։
Ղազախստանը՝ որպես Եվրոպայում անվտանգության և համագործության կազմակերպության (ԵԱՀԿ) գործող նախագահ, առաջարկել է հոկտեմբերի 29-30-ը Աստանայում կազմակերպության գագաթնաժողով անցկացնել։ ԵԱՀԿ նախորդ գագաթնաժողովն անցկացվել է 10 տարի առաջ։ -0-
