Վրաստանի նախկին վարչապետ, «Հանուն արդար Վրաստանի» շարժման առաջնորդ Զուրաբ Նողաիդելին Թբիլիսիի համար կարևոր է համարում ՌԴ վարչապետ Վլադիմիր Պուտինի հայտարարությունն այն մասին, որ Վրաստանն ու հակամարտող տարածաշրջանները պետք է իրենք հարաբերություններ կարգավորեն, այլ ոչ երրորդ երկրի մոտ լուծում փնտրեն, մասնավորապես՝ ԱՄՆ-ի։
Երկուշաբթի Պուտինը՝ մեկնաբանելով Վրաստանի ապաշրջափակման անհրաժեշտության մասին արած Հիլարի Քլինթոնի հայտարարությունը, հայտնեց, որ Ռուսաստանը պատերազմ չի սկսել, և, համապատասխանաբար, պատասխանատվությունը կրում են նրանք, ովքեր այն սկսել են։ «Ինչ-որ մեկը կարծում է, որ Հարավային Օսեթիան օկուպացված է, մեկ ուրիշը կարծում է, որ այն ազատագրված է։ Եվ սա երկխոսության առարկա է երկու երկրների միջև՝ վրացի և հարավօսեթացի։ Եվ այդ երկխոսության մեջ պետք է մտնել՝ չնետվելով դեպի երրորդ կողմ»,- ասաց ռուս վարչապետը։
«Այս հայտարարությունը նշանակալի ուղերձ է Վրաստանի համար։ Վրաստանն ինքնուրույն պետք է ճանապարհ փնտրի դեպի Աբխազիայի և Օսեթիայի սիրտը։ Մենք պետք է վերադարձնենք աբխազներին և օսեթներին։ Հակամարտության կարգավորման և Վրաստանի համախմբման համար սա միակ ճանապարհն է»,- Մոսկվայում լրագրողներին ասաց Նողաիդելին, որտեղ գտնվում էր այցով։ Նրա խոսքը մեջբերում է «Նովոստի-Գռուզիա» գործակալությունը։
«Ռուսաստանն այդ գործընթացներին միայն կնպաստի, եթե մեր կողմից նույնանման գործողություններ լինեն»,- ավելացրեց նախկին վարչապետը։ Նողաիդելին 2009թ.-ի հոկտեմբերից 8-րդ անգամ է Մոսկվա ժամանում։ Ճամփորդության ժամանակ Նողաիդելին հանդիպումներ է անցկացրել «Եդինայա Ռոսիայի» ներկայացուցիչների և վրացական սփյուռքի հետ։ -0-
