Ռուսաստանի «Առաջին ալիքի» բաժնետերերը վերընտրել են տնօրենների խորհուրդը

ԵՐԵՎԱՆ, 8 հունիսի. /Նովոստի-Արմենիա/. Ռուսաստանի «Առաջին ալիք» ԲԲԸ-ի բաժնետերերի հերթական տարեկան ժողովի ժամանակ վերընտրվել է ընկերության տնօրենների խորհուրդը, նրա կազմը գրեթե չի փոխվել, միայն ՌԴ նախագահի նախկին խորհրդական Միխայիլ Լեսինի փոխարեն տնօրենների խորհրդի կազմում ընդգրկվել է ՌԴ կապի և զանգվածային հաղորդակցությունների փոխնախարար Ալեքսանդր Ժարովը, երեքշաբթի տեղեկացրել է հեռուստաալիքի մամուլի ծառայությունը:

«Նիստը վարել է ընկերության տնօրենների խորհրդի նախագահ, ՌԴ փոխվարչապետ, ՌԴ կառավարության աշխատակազմի ղեկավար Սերգեյ Սոբյանինը: Ժողովի ժամանակ հաստատվել են ընկերության տարեկան զեկույցն ու հաշվապահական հաշվետվությունը, ինչպես նաև վերընտրվել է ընկերության տնօրենների խորհուրդը», - ասվում է տեղեկատվության մեջ, հաղորդում է «ՌԻԱ Նովոստին»:

Սոբյանինից և Ժարովից բացի տնօրենների խորհրդի կազմում ընդգրկվել են ՌԴ նախագահի վարչակազմի ղեկավարի տեղակալ Ալեքսեյ Գրոմովը, «Առաջին ալիք» ԲԲԸ-ի գլխավոր տնօրեն Կոնստանտին Էռնստը, «Առաջին ալիք» ԲԲԸ-ի գլխավոր տնօրենի տեղակալ և լրատվական ծրագրերի տնօրինության ղեկավար Կիրիլ Կլեյմյոնովը, ռեժիսոր և ՌԴ կինեմատոգրաֆիստների միության նախագահ Նիկիտա Միխալկովը, «Կինոկոնցեռն Մոսֆիլմի» գլխավոր տնօրեն Կարեն Շախնազարովը, Ռոսիմուշչեստվոյի ղեկավարի տեղակալ Իլյա Պետրովը, ՌԴ ԱԳՆ-ի Մոսկվայի միջազգային հարաբերությունների պետական ինստիտուտի ռեկտոր Անատոլի Տորկունովը:-0-