Հայտնի ջազմեն Գեորգի Գարանյանի հիշատակին նվիրված «Սիրո պատմություն. Մաեստրոյի սիրելի երաժշտությունը» համերգը, որին կմասնակցեն նրա ռուս և օտարերկրյա գործընկերները, կանցկացվի չորեքշաբթի Չայկովսկու անվան համերգասրահում, «ՌԻԱ Նովոստիին» տեղեկացրել են Մոսկվայի ֆիլհարմոնիայի մամուլի ծառայությունից:
«Համերգի ընթացքում կհնչի Գարանյանի սիրելի երաժշտությունն այն երաժիշտների կատարմամբ, ովքեր աշխատել են նրա հետ, ծանոթ եղել, ընկերություն արել», - պատմել է մամուլի ծառայության ներկայացուցիչը:
Համերգի ծրագրում ներառված են Պրիմայի, Գերշվինի, The Beatles-ի, Էլլինգտոնի, Բաբաջանյանի, Պետրովի, Զացեպինի և այլոց ստեղծագործությունները: Գարանյանի սիրելի երաժշտությունը կկատարվի տարբեր կազմերով՝ սոլո, դուետ, ջազային փոքր համույթ, «Մելոդիա» համույթ և ջազային մեծ նվագախումբ (բիգ-բենդ):
Մաեստրոյի ամենահայտնի զավակը՝ «Մելոդիա» համույթը, կկատարի «Ադամանդե ձեռքը», «Հաջողության ջենտլմենները» և շատ այլ հայտնի խորհրդային ֆիլմերի երաժշտական թեմաները: Գեորգի Գարանյանի բիգ-բենդը կկատարի ամերիկյան ջազային հիթեր: Համերգին ելույթ կունենան նաև Ռուսաստանը, Ամերիկան, Մեծ Բրիտանիան և Ֆինլանդիան ներկայացնող մեծանուն մեներգիչներ Թամարա Գվերցիտելին, Էլիեն Լիմուս-Սանդերսը (ԱՄՆ). Ռոբերտ Բրաունը (ԱՄՆ), Մարսելա Պապինին (Մեծ Բրիտանիա), ջութակահար Վիտալի Իմերելին (Ֆինլանդիա), դաշնակահար Դանիիլ Կրամերը, սակսոֆոնահարներ Դմիտրի Բրիլն ու Ալեքսանդր Բրիլը:
Մամուլի ծառայության ներկայացուցիչը նշել է նաև, որ Մեծ Բրիտանիայի նվագախմբի ղեկավար Մարսելա Պապինին առաջին անգամ Ռուսաստանում հանդես կգա ոչ միայն վոկալիստուհու դերում, այլև Գեորգի Գարանյանի բիգ-բենդի դիրիժորի դերում:
Համերգը կվարի Յանա Չուրիկովան:
Գործակալության զրուցակիցը պատմել է, որ սա արդեն Մոսկվայում անցկացվող ջազմենի հիշատակին նվիրված երկրորդ համերգն է: «Մեզ մոտ արդեն տեղի է ունեցել Գարանյանի հիշատակին նվիրված համերգ, սակայն ոչ բոլոր երաժիշտներն են դեռ արտահայտվել», - կարծում է նա:
Մեծանուն սակսոֆոնահար, դիրիժոր և կոմպոզիտոր Գարանյանը ծնվել է 1934 թ.-ի օգոստոսի 15-ին: Նա ներկայացնում էր ռուսական ջազի վարպետների հետպատերազմյան առաջին սերունդը:
Գարանյանը իր երաժշտական գործունեությունը սկսել է անցյալ դարի 50-ական թվականներին։ Ղեկավարել է «Մելոդիա» համույթը, որը համագործակցել է Իոսիֆ Կոբզոնի, Լյուդմիլա Գուրչենկոյի, Լև Լեշչենկոյի, Ալլա Պուգաչովայի և անվանի այլ աստղերի հետ։
Գարանյանը երաժշտություն է գրել խորհրդային մի շարք սիրված կինոֆիլմերի համար, որոնց թվում են «Պոկրովյան դարպասներ»ե, «Իրիկնային լաբիրինթոս», «Նրա երիտասարդության բաղադրատոմսը» և այլ ժապավեններ։
Նա հեռուստատեսությամբ վարել է «Ջեմ-5», իսկ ռադիոյով` «Գեորգի Գարանյանի ջազ-ակումբը» հաղորդաշարերը։
Ջազմենը Պրահայում, Բոմբեում, Հավանայում, Վարշավայում, Ֆինլանդիայում, Իսրայելում անցկացված միջազգային ջազային փառատոնների դափնեկիր է:
Արտիստը մահացել է 2010 թ.-ի հունվարի 11-ին՝ կյանքի 76-րդ տարում Կրասնոդարում սրտի կաթվածից, ուրտեղ նա պետք է մասնակցեր ամենամյա համերգին: Նրա աճյունն ամփոփված է Վագանկովյան գերեզմանատանը:-0-
