ԱՊՀ երկրների նկարիչներն իրենց աշխատանքներն են ներկայացնում Մոսկվայում

ԵՐԵՎԱՆ, 22 մարտի. /Նովոստի-Արմենիա/. Մոսկվայի Նկարչի կենտրոնական տանը բացվել է «ՑԴԽ-2010» Մոսկովյան միջազգային գեղարվեստական ցուցահանդեսը, «Նովոստի-Արմենիա» գործակալությանը տեղեկացրեց ԱՊՀ մասնակից-պետությունների Հումանիտար համագործակցության միջպետական հիմնադրամի մամուլի քարտուղար Ալեքսանդր Կալուգինը:

Ցուցահանդեսն անցկացվում է արդեն տասներեքերորդ անգամ՝ ներկայացնելով ԱՊՀ և Բալթյան երկրների նկարիչների միությունների, ինչպես նաև այլ ստեղծագործական կազմակերպությունների կերպարվեստի վարպետների աշխատանքները: Ցուցահանդեսին աջակցում է ԱՊՀ մասնակից-պետությունների Հումանիտար համագործակցության միջպետական հիմնադրամը:

«Գեղարվեստական ցուցահանդեսը հնարավորություն է տալիս ծանոթանալ ԱՊՀ և Բալթյան երկրների գծանկարիչների, գեղանկարիչների, քանդակագործների, նկարիչների և ճարտարապետների աշխատանքներին: Սա հիանալի հարթակ է շփման և փորձի փոխանակման, նոր ծանոթությունների և բացահայտումների համար», - կարծում է ԱՊՀ մասնակից-պետությունների Հումանիտար համագործակցության միջպետական հիմնադրամի գործադիր տնօրեն Արմեն Սմբատյանը:

Ցուցահանդեսը բաղկացած է չորս բաժնից: Միջոցառումներին կներկայացվեն 30 հատուկ ցուցանմուշներ, ինչպես նաև 26 պատկերասրահների, ակումբների, ստեղծագործական արվեստանոցների և միավորումների ցուցանմուշներ, ինչպես նաև առանձին նկարիչների ավելի քան 120 աշխատանքներ:

ԱՊՀ և Բալթյան երկրների նկարիչների միության ցուցանմուշների մեջ ընդգրկված են աշխատանքներ, որոնք ընտրվել են այդ երկրների գեղանկարիչների, գծանկարիչների, քանդակագործների արվեստանոցներում անցկացված մրցութային ցուցադրությունների արդյունքում:

Միջոցառմանը մասնակցում են Ադրբեջանի, Հայաստանի, Բելառուսի, Ղազախստանի, Ղրղզստանի, Մոլդովայի, Ռուսաստանի, Տաջիկստանի, Թուրքմենստանի, Ուզբեկստանի, Ուկրաինայի, ինչպես նաև Մոսկվա, Սանկտ Պետերբուրգ և Կիև քաղաքների նկարիչների միությունները, Ռուսաստանի նկարիչների ստեղծագործական միությունը, Ռուսաստանի արվեստների ակադեմիան, նաև Լատվիայի, Լիտվայի և Էստոնիայի նկարիչների միությունները:

Միջոցառման շրջանակներում մարտի 20-ին տեղի է ունեցել «Հետխորհրդային տարածքում ավանդական և ժամանակակից կերպարվեստի գեղարվեստական կառույցում պատկերի և հասկացության հարաբերակցության խնդիրները» թեմայով կլոր սեղանը: Հայաստանը միջոցառմանը ներկայացնում են Կարեն Աղամյանը, Մարատ Մարգարյանը, Տարոն Մուրադյանը, Սերգեյ Նարազյանը:-0-