ԵՐԵՎԱՆ, 26 հունվարի. /Նովոստի-Արմենիա/. Երկուշաբթի լույս երեքշաբթի գիշերը Մոսկվայի հյուսիսում անհայտ մի անձի ատրճանակի կրակոցից սպանվել է մի հայաստանցի, «ՌԻԱ Նովոստիին» է տեղեկացրել Մոսկվայի իրավապահ մարմինների աղբյուրը:
Նրա խոսքերով, սպանությունն իրականացվել է սրճարանում, որը գտնվում է Դմիտրովսկի խճուղու թիվ 133 տանը:
«Անհայտ անձը մի քանի անգամ կրակել է տղամարդու վրա, ով սրճարանում սեղանի առջև նստած էր մի կնոջ հետ: Մարդասպանը դիմել է փախուստի: Տուժածը ստացված վնասվածքներից տեղում մահացել է», - ասել է աղբյուրը:
Հարձակման ականատեսների վկայությամբ, մարդասպանը կովկասցու արտաքին է ունեցել, տեղեկացրել է գործակալության զրուցակիցը:
Նրա խոսքերով, դեպքի վայրում աշխատում է օպերատիվ-քննչական խումբը, որը պարզում է հանցագործության հանգամանքներն ու զենքի տեսակը:
«Չի բացառվում, որ հանցագործությունն իրականացվել է վեճից հետո, և հանցագործը կրակել է պնևմատիկ ատրճանակից», - ասել է աղբյուրը:
Պարզվում է նաև, թե ինչով էր զբաղվում զոհը Մոսկվայում, նշել է նա:-0-
