Ռուսաց լեզուն պետք է դիտարկել որպես մրցակցային առավելություն, այդ մասին չորեքշաբթի հայտարարել է Ուկրաինայի Գերագույն Ռադայի պատգամավոր Իննա Բոգոսլովսկայան
ՌԻԱ Նովոստիի կազմակերպած Եվրոպական և ասիական մեդիաֆորումի ընթացքում:
«Տասնութ տարի առաջ (ԽՍՀՄ փլուզման տարում) մեզ թվում էր, թե այն, ինչ մեզ համար ընդհանուր է, ընդհանուր է մնալու միշտ։ Այժմ մենք տեսանք, որ միմյանցով պետք է զբաղվել։ Մեզ թվում էր, թե լեզվի միասնականությունը հավերժական եղբայրության գրավականն է։ Պարզվում է, որ բոլորովին այդպես չէ։ Այսօր, խոսելով ռուսաց լեզվի մասին, մենք պետք է խոսենք այդ լեզվի մասին որպես նոր աշխարհի մրցակցային առավելության, մի լեզվի մասին, որն անգլերեն լեզվին զուգընթաց սկսում է իր տեղը զբաղեցնել միջպետական հանրությունում։ Եվ այդ առավելությունը մենք կորցնում ենք»,- ասել է Բոգոսլովսկայան, տեղեկացնում է ՌԻԱ Նովոստին։
Ըստ նրա, այս թեման, ինչպես նաև այն հարցը, թե ինչու՞ է երիտասարդին անհրաժեշտ իմանալ այս լեզուն, արդիական է ԶԼՄ-ների համար։ «Լատվիայում ռուսաց լեզվի իմացության համար կորպորացիաները աշխատավարձին 35 տոկոս հավելավճար են տրամադրում, իսկ անգլերենի իմացության համար՝ 10 տոկոս։ Սա նշանակում է, որ Լատվիայում ակնհայտ ռուսաֆոբիայի դեպքում այնտեղ գիտակցում են, որ այս լեզուն նոր տնտեսական տարածքների նվաճման լեզու է»,- ընդգծեց նա։
Սա հետխորհրդային երկրների ազգային ԶԼՄ-ների ներկայացուցիչների` թվով չորրորդ ամենամյա ֆորումն է: Նման հանդիպումների անցկացման նախաձեռնությամբ «ՌԻԱ Նովոստին» առաջին անգամ հանդես է եկել 2006 թ.-ին: Ամենամյա ֆորումի նպատակը ժամանակակից աշխարհում ԶԼՄ-ների առջև ծագած խնդիրների քննարկումն է:
Դրան կմասնակցեն հետխորհրդային պետությունների առավել հեղինակավոր ու զանգվածային տպագիր ու էլեկտրոնային հրատարակությունների շուրջ 150 ղեկավարներ և գլխավոր մենեջերներ, ինչպես նաև ավելի քան 150 ռուսաստանցի հյուրեր ու մասնակիցներ:
Ֆորումի ծրագիրը նախատեսում է դրսից եկած լրագրողների լայն շփման հնարավորություն ռուս գործընկերների, ՌԴ պետական կառույցների ղեկավարների, հայտնի քաղաքական ու հասարակական գործիչների հետ: Պանելային քննարկումների, կլոր սեղանների, ԶԼՄ-ների գործունեության առանձին ուղղություններով սեկցիոն աշխատանքների ընթացքում մասնակիցները կքննարկեն արդիական մասնագիտական հարցեր ու համատեղ մուլտիմեդիոն նախագծերի հնարավորություններ: -0-
