Ռուսաստանը ողջունում է Հայաստանի և Թուրքիայի միջև հարաբերությունների նորմալացման գործընթացը և մտադիր է հետագայում ևս նպաստել դրան, հայտարարել է ՌԴ նախագահ Դմիտրի Մեդվեդևը, հաղորդում է «ՌԻԱ Նովոստին»:
«Մենք ընդհանուր առմամբ դրական ենք վերաբերվում այն բանին, որ Հայաստանի և Թուրքիայի միջև հարաբերությունները զգալիորեն ջերմացել են, որ դուք փորձում եք հաղթահարել 20-րդ դարում եղած խնդիրները՝ դրսևորելով փոխադարձ զսպվածություն և փոխհամաձայնության որոնում: Այդ իսկ պատճառով ընդհանուր առմամբ մենք ողջունում ենք հարաբերությունների նորմալացման գործընթացը՝ այն միանգամայն խելամիտ ու արդարացի համարելով ընթացիկ կյանքում»,- ասել է նախագահը՝ չորեքաբթի պատասխանելով լրագրողների հարցերին «ՌԻԱ Նովոստիի» կազմակերպած Եվրոպական և ասիական մեդիաֆորումի ժամանակ:
Ընդ որում նա ընդգծեց, որ գլխավորը տվյալ հարցում այլ պետությունների ըմբռնումն է, որ հարաբերությունների վերականգնումը ուղղված չէ որևէ մեկի դեմ:
«Եթե ուղերձը ճիշտ ձևով ստեղծվի և ուղարկվի, ապա այս գործընթացներին ուշադիր կերպով հետևող այլ երկրներում լարվածություն չի լինի»,- հավելել է ռուսական պետության ղեկավարը:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, Անկարայի նախաձեռնությամբ 1993թ.-ից փակ է հայ-թուրքական սահմանը: Թուրքիան առաջ է քաշում երեք նախապայման՝ երկկողմ հարաբերությունների հաստատման համար. ղարաբաղյան հակամարտության կարգավորում՝ հօգուտ Ադրբեջանի, Հայաստանի կողմից Թուրքիայի սահմանների ճանաչում, Հայաստանի կողմից Օսմանյան կայսրությունում Հայոց ցեղասպանության միջազգային ճանաչման փորձից հրաժարում։-0-
