Ռուսաստանը պատրաստ է աջակցել հայ-թուրքական հարաբերությունների կարգավորման գործընթացին. ԵԱՀԿ-ում ՌԴ մշտական ներկայացուցիչ
ԵԱՀԿ-ում ՌԴ մշտական ներկայացուցիչ Անվար Ազիմովը Հայաստանի և Թուրքիայի միջև «հարաբերությունների կարգավորման ճանապարհին առաջին քայլը» համարեց հոկտեմբերի 10-ին Ցյուրիխում դիվանագիտական հարաբերությունների հաստատման և երկկողմ կապերի զարգացման մասին արձանագրությունների ստորագրումը, հաղորդում է «ՌԻԱ Նովոստին»:
«Երկու հարևան երկրների միջև կլիմայի առողջացումը պետք է օբյեկտիվորեն նպաստի երկու պետություններում առևտրային կապերի աշխուժացմանն ու սոցիալտնտեսական իրավիճակի բարելավմանը, ինչպես նաև Անդրկովկասում խաղաղության և կայունության ամրապնդմանը», - ասել է նա հինգշաբթի ԵԱՀԿ մշտական խորհրդի ժամանակ:
Նրա խոսքերով՝ այժմ կարևոր է, որպեսզի երկու կողմերը որքան հնարավոր է շուտ վավերացնեն այդ փաստաթղթերը և սկսեն դրանց գործնական իրականացումը:
Ազիմովն ընդգծել է, որ «արձանագրություններով նախատեսված քայլերից ոչ մեկը չի կարող մեկնաբանվել որպես երրորդ կողմին վնասող քայլ»:
«Ռուսաստանը պատրաստ է աջակցել հայ-թուրքական հարաբերությունների կարգավորման գործընթացին, այդ թվում նաև փոխշահավետ երկկողմ համագործակցության նախագծերի հետագա իրագործման միջոցով», - նշել է ռուս մշտական ներկայացուցիչը:-0-
