Մեդվեդևը կյանքում կարևորը սերն է համարում

ԵՐԵՎԱՆ, 25 սեպտեմբերի. /Նովոստի-Արմենիա/. Մարդու կյանքում կարևորագույն արժեքներից մեկը սերն է, հայտարարել է ՌԴ նախագահ Դմիտրի Մեդվեդևը՝ պատասխանելով Պետերբուրգի համալսարանի ուսանողների հարցերին, հաղորդում է «ՌԻԱ Նովոստին»:

«Սերը քեզ շրջապատող ամենահարազատ և ամենակարևոր զգացողությունն է: Մեզնից յուրաքանչյուրը տարբեր կերպ է հասկանում այդ բառը, սակայն հավանաբար դա է ամենակարևորը», - ասել է Մեդվեդևը՝ պատասխանելով այն հարցին, թե իր կյանքում ինչն է ամենագլխավորը համարում:

Այնուհետև ուսանողները դիմել են ՌԴ նախագահին՝ խնդրելով իրենց խորհուրդ տալ: «Խորհրդի համար ավելի լավ է դիմել դասախոսներին... սակայն որպես նախկին դասախոս, ես մի փոքր խորհուրդ ձեզ կտամ: Պահպանեք ձեր ունեցած ժամանակը: Դա ամենաերջանիկ ժամանակն է: Ինձ համար ամենաերջանիկ ժամանակն այն էր, երբ ես ուսանում էին իրավաբանական ֆակուլտետում: Դա անմոռանալի ժամանակ է և կյանքի կարևոր հիմքը: Պահպանեք այդ ժամանակը: Ես ձեզ նախանձում եմ», - ասել է Մեդվեդևը:-0-