Ապագա մայրերը խնդրում են բժիշկներին օգնել իրենց՝ երեխա լույս աշխարհ բերել գեղեցիկ ամսաթվի

Ապագա մայրերը, ովքեր ցանկանում են, որ իրենց երեխայի ծննդյան ամսաթիվը գեղեցիկ լինի, օրինակ, 9.09.09, հաճախ խնդրում են բժիշկներին օգնել իրենց՝ մանկիկին լույս աշխարհ բերել «պատվերով», «ՌԻԱ Նովոստիին» տեղեկացրել է Սնեգիրյովի անվան մանկաբարձության և գինեկոլոգիայի կլինիկայի ախտորոշման բաժնի պետ Անդրեյ Նիկոնովը:

«Երբեմն այդպես պատահում է: Ընդ որում նման խնդրանքները կապված են լինում ոչ միայն ամսաթվերի, այլև լուսնի փուլերի, կենդանակերպի նշանների հետ», - ասել է բժիշկը:

Նրա խոսքերով՝ 2008 թ.-ի օգոստոսին, երբ ամենագեղեցիկ տարեթիվը 8.08.08-ն  էր, իրեն էին դիմում ապագա մայրիկները՝ խնդրելով օգնել մանկիկին ծնվելու հենց այդ օրը: Սակայն ինչպես նշել է Նիկոնովը, նման խնդրանքների թիվը ծննդկանների ընդհանուր թվի գրեթե 0,1 տոկոսն է կազմում:

«Մենք ընդառաջ ենք գնում ապագա մայրիկին, եթե դա խելամտության սահմաններում է և չկան բժշկական հակացուցումներ, թեև ես կարծում եմ, որ չարժե բնությանը հակառակ գնալ», - նշել է բժիշկը:-0-