Ուկրաինայի խորհրդարանի աշխատանքը դադարեցվել է՝ ընդդիմության պահանջների պատճառով

ԵՐԵՎԱՆ, 8 հուլիսի. /Նովոստի-Արմենիա/. Ընդդիմադիր ռեգիոնների  կուսակցության պատգամավորները չորեքշաբթի խորհրդարանի լիագումար նիստից առաջ կրկին արգելափակել են Գերագույն ռադայի աշխատանքը, հաղորդում է ուկրաինական ՈՒՆԻԱՆ լրատվական գործակալությունը:

Ընդդիմությունը կրկին երկրում աշխատավարձերի և թոշակների բարձրացում է պահանջում, սակայն կառավարությունը խոսում է բյուջեում միջոցների բացակայության մասին: Ընդդիմությունը նաև պահանջում է ՆԳ նախարար Յուրի Լուցենկոյի և կրթության նախարար Իվան Վակարչուկի հրաժարականը: Այսպիսով՝ Ուկրաինայի խորհրդարանի աշխատանքների արգելափակումը շարունակվում է արդեն երեք աշխատանքային շաբաթ:

Ռեգիոնների կուսակցության պատգամավորները Գերագույն ռադայի նիստերի դահլիճում արգելափակել են նախագահությունըը, ամբիոնն ու կառավարության օթյակը:

Այժմ հայտնի չէ՝ տեղի կունենա՞ այսօր լիագումար նիստ արգելափակման պատճառով: Նիստը պետք է սկսվեր Երևանի ժամանակով ժամը 12:00-ին:

Երեքշաբթի խորհրդարանին չի հաջողվել անգամ բացել սեփական նիստը: Նախորդ երկու շաբաթվա ընթացքում, երբ ընդդիմությունը կարճ ժամանակով դադարեցրել է խորհրդարանի արգելափակումը, Ռադան կարողացել է լուծել միայն որոշ հարցեր:

Խորհրդարանի աշխատանքի արգելափակման ֆոնի ներքո՝ քաղաքական գործիչները սկսել են խոսել խորհրդարանի հնարավոր ցրման մասին:-0-