Ընդդիմության ծրագրերը ձախողել են Թբիլիսիի տեղական ինքնակառավարման մարմնի նիստը

Թբիլիսիի տեղական ինքնակառավարման մարմինը՝ Սաքրեբուլոն, ուրբաթ հետաձգել է իր նիստը՝ շենքը շրջափակելու ընդդիմության ծրագրերի պատճառով, Սաքրեբուլոյի մոտ հավաքված լրագրողներին և ընդդիմության ներկայացուցիչներին հայտարարել է մարմնի մամուլի ծառայության աշխատակիցը, հաղորդում է «ՌԻԱ Նովոստին»։

«Մենք պատրաստվում էինք բողոքել, որ Սաքրեբուլոն չի կատարել իր խոստումը և չի հավաքել աղբը Ռուսթավելու պողոտայից։ Քաղաքապետարանն ու Սաքրեբուլոն պետք է կատարեն իրենց գործառույթը։ Նրանք չպետք է քաղաքականացված լինեն», - հավաքվածների առջև հայտարարել է «Ժողովրդավարական շարժում՝ միասնական Վրաստան» կուսակցության առաջնորդ Նինո Բուրջանաձեն։ «Սաքրեբուլոն հետաձգել է նիստի անցակցումն՝ ավելի շատ լարվածություն չառաջացնելու նպատակով», -  իր հերթին հայտարարել է գերատեսչության մամուլի ծառայության ներկայացուցիչը։

«Վրաստանի ուղին» կուսակցության առաջնորդ Սալոմե Զուրաբիշվիլին այդ որոշումը որակել է որպես ընդդիմության հաղթանակ մինչ ակցիայի սկիզբը։

Այս ամենին ի պատասխան՝ ընդդիմությունը որոշել է չշրջափակել շենքը՝ չնայած տեղում, այնուամենայնիվ, մնացել էին ընդդիմության ակտիվիստներ և պահպանողական կուսակցության առաջնորդ Զվիադ Ձիձիգուրին, ով հայտարարել է Սաքրեբուլոյի շենքի մոտ՝ իշխանությունների կողմից ծրագրվող սադրանքի մասին։-0-