Մոսկվայում ծրագրվում է ստեղծել մայրաքաղաքի եռաչափ մոդելը, Մոսկվայում տեղի ունեցած կառավարության նիստի ժամանակ ասել է Մոսկվայի ճարտարապետության և քաղաքաշինության կոմիտեի նախագահ Ալեքսանդր Կուզմինը։
«Անհրաժեշտ է մշակել Մոսկվայի եռաչափ մոդելի հարցը։ Այն մեզ շատ կօգնի։ Պետք է հասնել նրան, որպեսզի ստեղծվի ողջ քաղաքի 10-հազարանոց մասշտաբով եռաչափ մոդելը», - ասել է Կուզմինը, հաղորդում է «ՌԻԱ Նովոստին»։
Նրա խոսքերով, քաղաքի ծավալային մոդելի ստեղծմանն ուղղված աշխատանքներն արդեն սկսվել են։ Գոյություն ունեն քաղաքի առանձին մասերի թվային մոդելները, օրինակ՝ «Նեսկուչնիյ սադ» - «Մոսկվա-Սիթի» զբոսաշրջային անցումային ավտոմայրուղու, «Նովոյե կոլցո Մոսկվի» ծրագրի շրջանակներում նախագծային բարձրահարկ օբյեկտների, «Մեգասպորտ» սառցե մարզահամալիրի, ինչպես նաև Մոսկվայի կենտրոնի որոշ մասերի թվային մոդելները։
«Եռաչափ մոդելը կարևոր է և ստորգետնյա, և վերգետնյա առումով։ Արդեն ձևավորվում են հաղորդակցությունները՝ հաշվի առնելով եռաչափ մոդելը։ Այս ամենը թույլ է տալիս աշխատանքները կատարել ավելի հստակ և արագ՝ իմանալով, թե որտեղ են իրար հատվում հաղորդակցությունները», - ասել է Կուզմինը։ Նա նաև նշել է, որ ծավալային մոդելը հատկապես կարևոր է քաղաքի կենտրոնական մասի և պատմամշակութային օբյեկտների համար։
Մոսկվայի ողջ տարածքը կարելի է ծածկել նաև ստորգետնյա մայրուղային հաղորդակցությունների եռաչափ մոդելով, այս ռեսուրսը կարող է ստեղծվել միայն Մոսկվայի ողջ տարածքի տեղանքի ռելիեֆի թվային մոդելը ստեղծելուց հետո, նշվում է Մոսկվայի կառավարության որոշման նախագծում։-0-
