ՌԴ ԱԴԾ-ն հայտնել է, որ Սոչիում մերկացվել է վրացական լրտեսը

Ռուսական հատուկ ծառայությունները մերկացրել են վրացական հետախուզության աշխատակից Մամուկ Մայսուրաձեի գործունեությունը, ով անօրինական կերպով գտնվել է ՌԴ-ում և փորձել Վրաստանի հատուկ ծառայությունների ցանց ստեղծել, երեքշաբթի ՌԻԱ Նովոստիին են հայտել Ռուսաստանի ԱԴԾ-ից:

«Իր ղեկավարության հրամանով Մայսուրաձեն 2007-ի կեսերին ժամանել է Սոչի՝ որպես Ուկրաինայի քաղաքացի և, մշակված առասպելին համապատասխան, սկսել է զբաղվել մասնավոր ձեռնարկատիրությամբ: Ուկրաինայի քաղաքացիությունն ու անհրաժեշտ փաստաթղթերը նա ստացել է վրացական հատուկ ծառայությունների ակտիվ աջակցության շնորհիվ, որոնք օպերատիվ հնարավորության միջոցով կարճ ժամանակում, շրջանցելով ուկրաինական սահմանադրությունը, պատրաստել են դրանք և փոխանցել հետախույզին»,- ասել է գործակալության զրուցակիցը:

ԱԴԾ տվյալներով, 2008թ. Մայսուրաձեն վրացական հետախուզության փողերով Սոչիում ինտերնետ-սրճարան է բացել, որն օգտագործվել է որպես կապի միջոց՝ նրա աշխատանքները ղեկավարող օտարերկրյա հատուկ ծառայությունների բարձրաստիճան աշխատակիցների հետ:  

Գործակալությանը զրուցակիցն ասել է, որ Մայսուրաձեն, այլ տվյալներից բացի, պետք է նաև Սոչիում 2014 թվականին անցկացվելիք Ձմեռային օլիմպիադայի նախապատրաստության վերաբերյալ տվյալներ հայթայթեր:--0-