«Մերոնք» «հեղափոխության թառամած վարդեր» են բերել վրացական դեսպանություն

«Մերոնք» երիտասարդական շարժման ակտիվիստները վրացական դեսպանության մոտ են դրել ավելի քան մեկուկես հազար թառամած վարդեր, որոնք, նրանց կարծիքով, խորհրդանշում են «գունավոր հեղափոխության» տապալումը, հաղորդում է ՌԻԱ Նովոստին։

«Մենք թառամած վարդեր ենք բերել, Վրաստանի հեղափոխության թառամած վարդեր։ Այն, ինչ տեղի ունեցավ Վրաստանում 2003 թվականին, չբերեց վրաց ազգին հասարակական բարգավճում, հաջողություն և խաղաղություն։ Վրաստանի ժողովուրդն այլևս չի կարող հանդուրժել կիսախելագար նախագահին»,- ՌԻԱ Նովոստիին է հայտնել շարժման հանձնակատար Մարիա Դրոկովան։

Երիտասարդներն ասում  են, որ բերել են ուղիղ 1850 թառամած վարդ, այն օրերի թվով, որ իշխանության ղեկին է գտնվում Վրաստանի նախագահ Միխայիլ Սահակաշվիլին։ Նրանք քայլել են կազմակերպված թափորով և լուռ դրել ծաղիկները՝ իրենց երթն անվանելով սգո երթ՝ «վարդերի վրացական հեղափոխության սգո երթ»։

«Մերոնք» սատարում են բոլորին, ովքեր հանդես են գալիս Թբիլիսիում Սահակաշվիլու դեմ և նրա հրաժարականն են պահանջում։ Երիտասարդները համոզված են նաև, որ Վրաստանում «պետք է անցկացվեն վաղաժամկետ ընտրություններ, և եղբայրական վրաց ժողովուրդը պետք է ունենա նոր առաջնորդ, ով կկարողանա հարաբերություններ կառուցել Ռուսաստանի հետ և երջանկացնել ժողովրդին»։

«Մերոնք» շարժումը ցույցեր է կազմակերպում Վրաստանի և Մոլդովայի դեսպանությունների մոտ նախորդ շաբաթվանից։ Թբիլիսիում Վրաստանի հիմնական ընդդիմադիր կուսակցություններն ապրիլի 9-ից ակցիաներ են անցկացնում Սահակաշվիլու հրաժարականի պահանջով։ -0-