Ընդդիմությունը կողմնակիցներ է հավաքում Թբիլիսիի տարբեր հատվածներում
Ընդդիմության ներկայացուցիչները՝ Վրաստանի նախագահ Միխայիլ Սահակաշվիլու հրաժարականի պահանջով բողոքի ակցիայի կազմակերպիչները, հինգշաբթի առավոտից ուղղվել են Թբիլիսիի տարբեր մասեր՝ կողմնակիցներ հավաքելու համար։ Ակցիան պետք է սկսվի տեղական ժամանակով ժամը 14։00-ին խորհրդարանի շենքի մոտ, հաղորդում է «ՌԻԱ Նովոստին»։
«Ընդդիմության առաջնորդները քաղաքի տարբեր հատվածներում են։ Կեսօրին նրանք պետք է հավաքեն իրենց կողմնակիցներին տեղերում և շարժվեն խորհրդարանի ուղղությամբ»,- «Նովոստի-Գրուզիա» գործակալությանը հայտնեցին խորհրդարանի քարտուղարությունից։
Վրաստանի խորհրդարանի նախկին խոսնակ, «Ժողովրդավարական Վրաստան՝ Միասնական Վրաստան» շարժման առաջնորդ Նինո Բուրջանաձեն կողմնակիցներ է հավաքում Թբիլիսիի պետհամալսարանի գլխավոր մասնաշենքի մոտ, ՄԱԿ-ում Վրաստանի նախկին դեսպան, «Դաշինք Վրաստանի համար» շարժման առաջնորդ Իրակլի Ալասանիան, Միավորված ընդդիմության առաջնորդներից մեկը՝ Լևան Գաչիչելաձեն՝ Հանրային հեռուստաընկերության շենքի մոտ։ Պաշտպանության նախկին նախարար Իրակլի Օքրուաշվիլիի հիմնած «Միասնական Վրաստանի համար» Կուսակցության առաջնորդները կողմնակիցներին հավաքում են նախագահի Հավլաբարի նստավայրի մոտ։ «Դինամո» մարզադաշտի մոտ հավաքվել են Ազգային ֆորումի առաջնորդները։ Նախկին արտգործնախարար, «Վրաստանի ուղի» կուսակցության առաջնորդ Սալոմե Զուրաբիշվիլին գտնվում է խորհրդարանի շենքի մոտ, որտեղ կանցկացվի ակցիայի հիմնական մասը։
Առավոտյան շենքի մոտ տեղադրվել է բեմ, որի վերևի մասում փակցվել են «Թող Միշան հեռանա», «People for Saakashvili's resignation» ցուցապաստառները։ Տեղադրվել են նաև երկու վրաններ, որոնցից մեկում տեղակայվել է ակցիայի շտաբը, երկրորդում՝ մամուլի կենտրոնը։
Խորհրդարանի շենքի մոտ կեսօրին հավաքվել է մոտ 500 մարդ, բայց նրանցից ոչ բոլորն են ակցիայի մասնակիցներ. Ավանդաբար ապրիլի 9-ին Թբիլիսիի բնակիչները ծաղկեպսակներ են դնում և մոմեր վառում 20 տարի առաջ զորքերի կողմից Վրաստանի անկախության համար խաղաղ հանրահավաքը ցրելու ժամանակ զոհվածների հիշատակի հուշակոթողի մոտ։ -0-
