Ռուսաստանի հավաքականից Գուս Հիդդինկի հեռանալու մասին լուրերը ծիծաղելի են. ՌՖՄ
ԵՐԵՎԱՆ, 27 փետրվարի. /Նովոստի-Արմենիա/. Գուս Հիդդինկի՝ Ռուսաստանի հավաքականից հեռանալու մասին լուրերը չեն համապատասխանում իրականությանը, «ՌԻԱ Նովոստիին» հայտարարեց Ռուսաստանի ֆուտբոլի միության (ՌՖՄ) ղեկավար Անդրեյ Մալոսոլովը՝ մեկնաբանելով Daily Mail-ի տեղեկատվությունը Հիդդինկին «Զենիթի» մարզիչ Դիկ Ադվոկատով։հնարավոր փոխարինման մասին:
«Երբ Հիդդինկը ՌՖՄ-ի ղեկավարության հետ պայմանավորվում էր պաշտոնների համատեղման մասին (հավաքականում և «Չելսիում»), բոլոր հարցերը լուծվեցին։ Հիդդինկը կաշխատի Ռուսաստանի հավաքականի հետ մինչև պայմանագրի ավարտը։ Հիդդինկի շուրջ բոլոր լուրերն արդեն ոչ թե հոգնեցնում են, այլ պարզապես ծիծաղելի են»,- ասաց Մալոսոլովը։
Daily Mail-ի հաղորդմամբ, Դիկ Ադվոկատը կարող է հավաքականում փոխարինել իր հայրենակցին, եթե Հիդդինկը որոշի մնալ «Չելսիում» այս խաղաշրջանի ավարտից հետո։ Թերթի տվյալներով, դրանում շահագրգռված է լոնդոնյան ակումբի սեփականատեր Ռոման Աբրամովիչը։
«Ինքը՝ Հիդդինկը, բազմիցս հայտարարել է, որ չի պատրաստվում հեռանալ և աշխատելու է Ռուսաստանի հավաքականի հետ»,- հավելեց ՌՖՄ ներկայացուցիչը։ -0-
