2014 թ.-ին Սոչիում կայանալիք ձմեռային օլիմպիական խաղերի նավթային հովանավորը կդառնա «Ռոսնեֆտը», որն ավելի քան 160 միլիոն դոլար է առաջարկել, երեքշաբթի հաղորդում է «Վեդոմոստի» թերթը։
Ինչպես հրատարակությանը տեղեկացրել է ընկերության աշխատակիցը, «Սոչի-2014» կազմկոմիտեի հետ գործընկերության մասին համաձայնագիրն այսօր է ստորագրվելու, ըստ այդ համաձայնագրի՝ «Ռոսնեֆտը» կդառնա և Օլիմպիադայի, և Պարաօլիմպիկ խաղերի ազգային հովանավորը «նավթ» կատեգորիայում, հաղորդում է «ՌԻԱ Նովոստին»։
«Ռոսնեֆտը» Ռուսաստանի խոշորագույն նավթային ընկերությունն է, որի բաժնետոմսերի 75,2 տոկոսը պատկանում է պետական «Ռոսնեֆտեգազին»։
Ինչպես թերթին տեղեկացրել է Սպորտի և զբոսաշրջության նախարարության պաշտոնյան, «Ռոսնեֆտը» կդառնա ռուսական օլիմպիական հավաքականի գործընկերը մինչև 2016 թ.-ի Օլիմպիադան, և նա, որպես առաջին կարգի հովանավոր, իրավունքի կունենա մարկետինգային նպատակներով օգտագործել «Սոչի-2014»-ի խորհրդանիշը վեց տարվա ընթացքում։
Պաշտոնյայի տվյալներով՝ հովանավորչական պայմանագրի գումարը կգերազանցի 160 միլիոն դոլարը։
«Ռոսնեֆտ» ընկերության մամուլի ծառայությունը չի հաստատել և չի հերքել օլիմպիական հովանավորության մասին տեղեկատվությունը։ «Սոչի-2014» կազմկոմիտեի մամուլի ծառայության աշխատակիցն ասել է, որ համաձայնագիրը կստորագրվի փետրվարի 24-ին, սակայն հրաժարվել է հրապարակել Օլիմպիադայի գործընկերոջ անունը։ Հովանավորի կարգավիճակին հավակնում էին նաև «Լուկոյլն» ու ТНК-BP-ն։
«Ռոսնեֆտը» Սոչի-2014-ի երրորդ ազգային հովանավորն է։ Հունվարին «Ռոստելեկոմի» և «Մեգաֆոնի» կոնսորցիումը հաղթել է «հեռահաղորդակցություն» կատեգորիայում՝ պարտավորվելով ութ տարվա ընթացքում հովանավորի կարգավիճակի համար վճարել 130 միլիոն դոլար և ևս 130 միլիոն դոլարի ծառայություններ մատուցել։ Սա հովանավորչական գումարի ամենամեծ ներդրումն է օլիմպիական շարժման ողջ պատմության ընթացքում։
«Ռոսնեֆտի» պայմանագիրը ևս խոստանում է ռեկորդային լինել. նավթային ընկերությունների շրջանում մինչ այս օլիմպիական չեմպիոնն էր BP-ն, որը Լոնդոն-2012 օլիմպիական խաղերի ժամանակ առաջին կարգի գործընկեր կարգավիճակի համար վճարել է 50 միլիոն ֆունտ ստերլինգ։
«Սոչի-2014»-ի կազմկոմիտեն այս տարի առաջին կարգի հովանավորներ կընտրի ևս վեց կատեգորիաներում՝ յուրաքանչյուրի համար պայմանագրի գումարը պետք է լինի 100 միլիոն դոլարից ոչ պակաս։-0-
