Օլեգ Յանկովկսին բուժումից հետո կրկին շարքում է

ԽՍՀՄ ժողովրդական արտիստ Օլեգ Յանկովկսին բուժումից հետո վերադարձել է բեմ. երեկ նա հանդես է եկել «Ամուսնություն» ներկայացման պրեմիերայում։

«Ես վաղուց նման ուրախության զգացումով թատրոն չէի եկել», - «ՌԻԱ Նովոստիին» տված հարցազրույցում ասել է «Լենկոմի» գեղարվեստական ղեկավար և գլխավոր ռեժիսոր Մարկ Զախարովը։

Նրա խոսքերով, վերջերս թատրոնի շուրջ բավականին շատ չճշտված տեղեկատվություններ էին հնչում։ «Ինչ վերաբերում է Օլեգ Յանկովկսուն, ապա նրա մոտ իսկապես ենթաստամոքսային գեղձի հետ կապված ոչ այնքան լավ ախտորոշում էր, սակայն թատրոնը ձեռնարկեց հնարավոր բոլոր միջոցները։ Մենք կապվեցինք լավագույն բժիշկների հետ, և նա բուժում ստացավ Ռուսաստանում և Գերմանիայում, ուր մեկ ամսից կրկին պետք է վերադառնա։ Իսկ այսօր նրան բուռն ծափահարություններով են դիմավորել», - ասել է ռեժիսորը։

«Դատելով նրանից, թե ինչպիսի տեսք ունի Յանկովսկին, ինչպես է խոսում, որքան եռանդուն է, ես համոզված եմ, որ այդ հիվանդությունը նա կհաղթահարի։ Այսօր թատրոնում բոլորը երջանիկ են, որ նա կենդանի է, առողջ, և որ նա կրկին հարազատ թատրոնի բեմում է», - ասել է Զախարովը։

Յանկովկսին դիագնոստիկ հետազոտություն է անցել Գերմանիայում հունվարի 21-ից։ Ավելի վաղ հաղորդվում էր, որ երկու ներկայացումներում Յանկովսկու դերերը կխաղան այլ դերասաններ։-0-