ՌԴ արտգործնախարար Սերգեյ Լավրովն ու ԵՄ «եռյակը» չորեքշաբթի Մոսկվայում կքննարկեն եվրոպական անվտանգության հարցերը՝ հաշվի առնելով ՌԴ նախագահ Դմիտրի Մեդվեդևի՝ Եվրոպայի անվտանգության նոր ճարտարապետության նախաձեռնությունը, ինչպես նաև Կոկվասում տիրող իրավիճակի կարգավորումը։
ԵՄ-ի կողմից հանդիպմանը կմասնակցեն Չեխիայի արտգործնախարար Կարել Շվարցենբերգը, Շվեդիայի արտգործնախարար Կարլ Բիլդտը, ինչպես նաև Եվրամիության միասնական արտաքին և անվտանգության քաղաքականության գերագույն ներկայացուցիչ Խավիեր Սոլանան և եվրոպական հարևանության քաղաքականության հարցերով և արտաքին հարաբերությունների եվրոպական հանձնակատար Բենիտա Ֆերերո-Վալդները։
«Օրակարգում ներառված են Ռուսաստան-ԵՄ արտաքին անվտանգության ընդհանուր տարածքի ձևավորման հարցերը, եվրոպական անվտանգության հարցերը՝ այդ թվում նաև եվրոատլանտյան անվտանգության նոր ճարտարապետության ստեղծման և համապատասխան պայմանագրի ստորագրման վերաբերյալ ՌԴ նախագահ Դմիտրի Մեդվեդևի նախաձեռնության համատեքստում», - ավելի վաղ «ՌԻԱ Նովոստիին» տեղեկացրել էր Եվրամիությունում ՌԴ մշտական ներկայացուցիչ Վլադիմիր Չիժովը։
Եվրոանվտանգության մասին պայմանագրի մշակման նախաձեռնությունը Մեդվեդևը ներկայացրել էր 2008 թ.-ի հունիսի 4-ին Բեռլինում։ Նոր պայմանագրի հիմնական դրույթների թվում Ռուսաստանը տեսնում է հարգանքը պետությունների ինքնավարության, տարածքային ամբողջականության և քաղաքական անկախության նկատմամբ։
Պայմանագրի առաջնահերթությունների թվում են նաև ուժի կիրառման անթույլատրելիությունը, հավասար անվտանգության ապահովման երաշխիքները, սպառազինությունների վերահսկողության բազային չափանիշների սահմանումն ու ռազմական շինարարության խոհեմությունը, ինչպես նաև դրույթն այն մասին, որ ոչ մի պետություն և ոչ մի միջազգային կազմակերպություն չի կարող Եվրոպայում խաղաղության և կայունության ապահովման բացառիկ իրավունքներ ունենալ։
Չիժովի խոսքերով, ԵՄ-ն նկատելի շահագրգռվածություն է ցուցաբերում և ընդհանուր առմամբ դրական է վերաբերվում եվրոատլանտյան անվտանգության նոր ճարտարապետության գաղափարին, «սակայն դեռևս անհրաժեշտ է քննարկել մանրամասները»։
Նա ավելացրել է, որ կողմերը նաև կքննարկեն մի շարք հրատապ տարածաշրջանային հարցեր, այնպիսիք, ինչպիսին է մերձարևելյան կարգավորումը։
«Հավանաբար կքննարկվի տարածաշրջանում տիրող իրավիճակը, որը ԵՄ-ում անվանում են «Հարավային Կովկաս»՝ ճնշում գործադրելով Վրաստանի վրա։ Ակնհայտ է, որ կքննարկվի մեր փոխգործակցությունը ԵՄ-ի հետ՝ խաղաղապահության, ճգնաժամերի կարգավորման գործում։ Մենք նաև Եվրամիության հետ համակարգում ենք մեր հակածովահենային գործողությունները Սոմալիի շրջանում», - եզրափակել է Չիժովը։-0-
