Արագ արձագանքման կոլեկտիվ ուժերի ստեղծումը Հավաքական անվտանգության պայմանագրի կազմակերպության զարգացման և ամրապնդման հերթական փուլն է, չորեքշաբթի ասել է ՀՀ նախագահ Սերժ Սարգսյանը։
«Արագ արձագանքման կոլեկտիվ ուժերի ստեղծումը կամրապնդի անվտանգությունն աշխարհում, ոչ թե միայն Հարավային Կովկասում», - Մոսկվայում լրագրողներին ասել է Սարգսյանը։
Նրա խոսքերով, նման ուժերի ստեղծմամբ շահագրգռված են ՀԱՊԿ անդամ բոլոր պետությունները։
«Եթե մեզ հաջողվի մի քանի ամսվա ընթացքում ստեղծել նման ուժեր, ապա դրանից կշահի միայն մեր պետությունների անվտանգությունը», - ընդգծել է Սարգսյանը։
Հավաքական անվտանգության պայմանագրի կազմակերպության արագ արձագանքման կոլեկտիվ ուժերի ստեղծման մասին համաձայնագիրը ստորագրվել է չորեքշաբթի Կրեմլում` ՀԱՊԿ առաջնորդների հանդիպման ժամանակ։
Կոլեկտիվ ուժերը կօգտագործվեն ռազմական ագրեսիայի կասեցման, միջազգային ահաբեկչության ու ծայրահեղականության, միջազգային կազմակերպված հանցավորության, թմրանյութերի շրջանառության դեմ պայքարի հատուկ օպերացիաների անցկացման, ինչպես նաև արտակարգ իրավիճակների հետևանքների վերացման համար։
Ներկայումս հավաքական անվտանգության համակարգը կառուցվում է տարածաշրջանային սկզբունքով։ Գոյություն ունեն երեք տարածաշրջանային զորամիավորումներ՝ ռուս-բելառուսական (արևելաեվրոպական), ռուս-հայկական (կովկասյան) և կենտրոնական ասիական։
Ծրագրվում է, որ կոլեկտիվ ուժերը մշտական հիմունքներով կտեղակայվեն Ռուսաստանում, և նրանց կենթարկվեն ՀԱՊԿ երկրների զինվորական ստորաբաժանումները։ Բոլոր ուժերը կունենան ընդհանուր հրամանատարություն։ Որպես հնարավոր տարբերակ ենթադրվում է, որ ուժերի կորիզը կլինեն 98-րդ գվարդիական օդադեսանտային դիվիզիան և Ռուսաստանի օդադեսանտային զորքերի 31-րդ գրոհային բրիգադը։
Արագ արձագանքման հավաքական ուժերը ՀԱՊԿ շրջանակներում Կենտրոնական Ասիայի տարածաշրջանում գոյություն ունեն գումարտակների մակարդակով։ Օպերատիվ արձագանքման ուժերի նոր ձևաչափը ենթադրում է ՀԱՊԿ բոլոր անդամ-պետությունների միավորումներից և մասերից ավելի խոշոր խմբավորման ստեղծում։ -0-
