Առաջին մեծության աստղերը Մոսկվայում կմասնակցեն Կոնստանտին Օրբելյանի համերգին

ԵՐԵՎԱՆ, 22 հունվարի. /Նովոստի-Արմենիա/.Առաջին մեծության աստղերը կմասնակցեն հայտնի կոմպոզիտոր Կոնստանտին Օրբելյանի հոբելյանական եզրափակիչ համերգին, որը տեղի կունենա Մոսկվայի Կրեմլի պետական պալատում փետրվարի 24-ին, «Նովոստի-Արմենիա» գործակալությանը տեղեկացրեց Հայաստանի ազգային ավիափոխադրող «Արմավիա» ավիաընկերության PR-մենեջեր Անահիտ Այվազյանը։

«Երեկոյի հրավիրված հյուրերի թվում են Դմիտրի Խվորոստովսկին, Ալլա Պուգաչովան, Իոսիֆ Կոբզոնը, Սոֆիա Ռոտառուն, Լարիսա Դոլինան, Եվգենի Պետրոսյանը, Վալերի Լեոնտևը, Արմեն Ջիգարխանյանը, ՎԻԱ «Սլիվկին», «Քամեդի Քլաբի» ներկայացուցիչները», - ասաց Այվազյանը։

Նրա խոսքերով, համերգին Հայաստանը կներկայացնեն Ջիվան Գասպարյանը, Աշոտ Ղազարյանը, Արմեն Մարտիրոսյանը և Հայաստանի ջազ-բենդը, ինչպես նաև հանրապետության հայտնի երգիչ-երգչուհիներ Սոնան, Սյուզան Մարգարյանը, Արմինկան, Էռնա Յուզբաշյանը, Արամեն, Ռազմիկ Ամյանը, Նադեժդա Սարգսյանը, Էմին, Արամոն, Էմմա Պետրոսյանը, Ռադիկ Գաբրիելյանը, Գոգան։

Այվազյանը նշեց, որ համերգը լայնորեն լուսաբանվելու է հայկական և ռուսական հեռուստառադիոալիքներով, մասնավորապես, «Ռադիո Ալլայի», Հայաստանի հանրային հեռուստաընկերության, «Շանթ» հեռուստաալիքի, ռուսական РТР, МузТВ հեռուստաալիքներով։

ԽՍՀՄ ժողովրդական արտիստ Կոնստանտին Օրբելյանը ծնվել է 1928 թ.-ի հուլիսի 29-ին Արմավիր քաղաքում։ 1957 թ.-ից ԽՍՀՄ Կոմպոզիտորների միության անդամ է։ Պարգևատրվել է Ժողովուրդների բարեկամության, «Հարգանքի տուրք» շքանշաններով։

«Արմավիա» ավիաընկերությունը հայկական ավիացիոն շուկայի առաջատարն է և Հայաստանի ազգային ավիափոխադրողը։ Ընկերությունը ստեղծվել է 1996թ.-ին։ 2005 թ. հունիսից ավիաընկերության 100 տոկոս բաժնետերն է «MIKA Armenia Trading» ընկերության նախագահ Միխայիլ Բաղդասարովը։

Այսօր ավիաընկերությունն իր հաճախորդներին է առաջարկում դեպի Ռուսաստան և ԱՊՀ քաղաքներ, ինչպես նաև Մերձավոր Արևելքի և Եվրոպայի քաղաքներ չվերթերի՝ Հայատանում ամենախոշոր ցանցը։ «Արմավիան» շաբաթական շուրջ 70 կանոնավոր չվերթեր է իրականացնում 35 ուղղություններով՝ դեպի ԱՊՀ և Եվրոպայի երկրներ։ -0-