ԵՐԵՎԱՆ, 16 հունվարի. /Նովոստի-Արմենիա/. Հարավային Օսեթիայում հակամարտության զոհերի թվի հստակեցման գործընթացը դեռ չի ավարտվել, հայտարարեց ՌԴ արտաքին գործերի նախարար Սերգեյ Լավրովը Մոսկվայում կայացած մամուլի ասուլիսի ժամանակ։
«Ինչ վերաբերում է պատերազմի ծամանակ զոհվածներին, Հարավային Օսեթիայի ներկա իշխանությունները նշում են, որ շատերի ինքնությունը հաստատել չեն կարող, որովհետև, երբ գրեթե 40 հազար փախստականներ վրացական ռումբերից փախուստի էին դիմում Հյուսիսային Օսեթիա, անհասկանալի է՝ նրանցից ով վերադարձավ, դա չի պարզվել»,- ասաց նախարարը։ «Գործընթացը շարունակվում է, դա բարդ գործընթաց է»,- նշեց Լավրովը։
«Երեկ մենք ՄԱԿ-ի զինված հակամարտությունների զոհերին նվիրված Անվտանգության խորհրդում մեր ներկայացուցչի միջոցով հիշեցրեցինք, որ մենք պնդում ենք հետաքննության անցկացումը և քրեական պատասխանատվության ենթարկելն այն անձանց, ովքեր Ցխինվալիի վրա հանցավոր հարձակման հրաման են տվել»,- հայտնեց ՌԴ ԱԳՆ ղեկավարը։
«Մենք այս թեման չենք մոռանում»,- ընդգծեց նա։ 2008թ. օգոստոսի 8-12-ը Վրաստանը ռազմական օպերացիա իրականացրեց Հարավային Օսեթիայում։ Վրացական զորքերը գրեթե ամբողջովին ավերեցին հանրապետության մայրաքաղաք Ցխինվալի քաղաքը և բազմաթիվ բնակավայրեր՝ սպանելով, հարավօսական իշխանությունների գնահատականներով, շուրջ մեկուկես հազար խաղաղ բնակչի։
Թբիլիսիում ծրագրել էին նաև ագրեսիա՝ Աբխազիայի նկատմամբ։
Ռուսաստանը ստիպված եղավ անցկացնել օպերացիա՝ Վրաստանին խաղաղության հարկադրելու համար։ Օգոստոսի 26-ին Մոսկվան ճանաչեց Հարավային Օսեթիայի և Աբխազիայի անկախությունը։ -0-
