Թուրքական ընկերությունը տանկերի արդիականացման շուրջ բանակցություններ է վարում Ադրբեջանի պաշտպանության նախարարության հետ
«Aselsan» թուրքական ռազմաարդյունաբերող ընկերությունը բանակցություններ է վարում Ադրբեջանի պաշպանության նախարարության հետ ադրբեջանական բանակի Т-72 տանկերի արդիականացման շուրջ, ուրբաթ հաղորդում է Trend News տեղեկատվական գործակալությունը՝ հղում անելով «Aselsan – Baki» ընկերության տնօրեն Սերդար Սեզեմներին։
Արդիականացումից հետո տանկերի ռազմական հզորությունը շատ ավելի կբարձրանա, նրանք կապահովվեն գիշերային տեսողության սարքերով, որոնք թույլ են տալիս թիրախը տեսնել մթության մեջ 3500 մետր հեռավորությունից։ Թիրախի կոորդինատների որոշումը, զենքի ընտրությունն ու կրակոցը իրականացվելու են համակարգչային համակարգի միջոցով, հաղորդում է «ՌԻԱ Նովոստին»։
«Аselsan»-ի ներկայացուցչի խոսքերով, համաձայնություն ձեռք բերելու դեպքում արդիականացումը կիրականացվի Բաքվում։
Սեզեմներն ասել է նաև, որ օրերս ստորագրվել է պայմանագիր, որը նախատեսում է Ադրբեջանի ներքին զորքերն ապահովել գիշերային տեսողության սարքերով։
«Аselsan» ընկերությունն արդեն ապահովել է Ադրբեջանի Զինված ուժերը անլար կապով, փոխանցվել են նաև անլար կապի սարքավորումներ, որոնք նախատեսված են ռազմական գործողությունների ընթացքում զինվորների անհատական օգտագործման համար։
Բացի այդ, նրա խոսքերով, մոտ օրերի ընթացքում ակնկալվում է, որ ադրբեջանական բանակին կփոխանցվեն ժամանակակից սաքավորումներ, որոնք բանակում ապահովում են անլար գաղտնի կապ, որոնց հիմնական առանձնահատկությունը միայն Ադրբեջանին պատկանող ծածկագրերի համակարգերի ապահովումն է։
Սեզեմները տեղեկացրել է, որ մոտ ապագայում այդ սարքերի համատեղ արտադրություն է ծրագրվում։
Նա ավելացրել է, որ ուսումնասիրվում են նաև ռազմաարդյունաբերական արտադրանքի համատեղ արտադրության ոլորտում համագործակցության այլ հեռանկարներ։
«Վերջերս Թուրքիայի պաշտպանության նախարարությանն առընթեր Ռազմական արդյունաբերության խորհրդի ղեկավարությունն այցելել էր Բաքու։ Պատվիրակությունը հանդիպել է Ադրբեջանի ռազմական արդյունաբերության նախարարի հետ։ Կողմերը քննարկել են Թուրքիայի հետ Բաքվի «Ալով», «Օզոն» և մեքենաշինական գործարաններում ռազմական արդյունաբերության արտադրանքի համատեղ արտադրության հնարավորությունները։ Այս ուղղությամբ տարվող աշխատանքները շարունակվում են», - ասել է նա։-0-
