Ռուսաստանում գործատուներն աշխատանքից ազատելու փոխարեն նախընտրում են ուշացնել աշխատավարձերը. թերթ

Մի քանի շաբաթվա ընթացքում աշխատողների կրճատման աճի տեմպերը պակասել են, սակայն կրկնակի անգամ աճել են աշխատավարձերի ուշացումները։ Փորձագետները կարծում են, որ հետագայում գործատուները կնախընտրեն աշխատանքից ազատելու փոխարեն ուշացնել աշխատավարձերը և աշխատակիցների հաշվին տրվող արձակուրդները, չորեքշաբթի գրում է «Վեդոմոստի» թերթը։

2008 թ.-ի դեկտեմբերի 4-9-ը զբաղվածության ծառայության մարմիններում գրանցված գործազուրկների թիվն աճել է 0,8 տոկոսով և 2008 թ.-ի դեկտեմբերի 9-ի դրությամբ կազմել է 1,326 մլն մարդ, գրում է հրատարակությունը՝ հիշեցնելով, որ անցած շաբաթվա դրությամբ այդ աճը կազմել է 1,67 տոկոս, իսկ մեկ շաբաթ ավելի վաղ՝ 2,3 տոկոս։

«Աշխատանքից ազատելու ալիքի անկման մասին ես չէի խոսի, չէ՞ որ տնտեսության իրական հատվածում ճգնաժամն իրեն զգացնել կտա միայն փետրվար-մարտին», - կարծում է Սոցիալական քաղաքականության անկախ ինստիտուտի տնօրեն Տատյանա Մալևան։

Ինչպես հաղորդում է ՌԴ առողջապահության և սոցիալական զարգացման նախարարությունը, դեկտեմբերի 10-ի դրությամբ գործատուի մեղքով աշխատանքից զրկված՝ ոչ ամբողջական աշխատանքային օր աշխատող աշխատակիցների, ինչպես նաև գործատուի նախաձեռնությամբ արձակուրդի մեջ գտնվող աշխատակիցների թիվն աճել է անցած շաբաթվա համեմատ և կազմել 207 589 մարդ։

Ռուսաստանում նոյեմբերին աշխատավարձերի ուշացումը կտրուկ աճել է՝ 93 տոկոսով (հոկտեմբերին՝ 33,4 տոկոսով և սեպտեմբերին՝ 2,1 տոկոսով)։

Ինչպես երեքշաբթի հաղորդել է ՌԴ պետական վիճակագրության դաշնային ծառայությունը, նոյեմբերին աշխատավարձերի պարտքն ավելացել է 3,741 միլիարդ ռուբլով և հասել 7,765 ռուբլու։

«Եթե հոկտեմբերին աշխատատեղերի թիվը կրճատվել էր 15 տոկոսով, ապա նոյեմբերին այն կրճատվել է 33 տոկոսով (ընդ որում ամենաշատը շինարարական ոլորտում՝ 63 տոկոս և ֆինանսական ոլորտում՝ 56 տոկոս)», - նշում է Աշխատակազմի ընտրության հարցերով խորհրդատուների ասոցիացիայի գործադիր տնօրեն Վալերի Օսկինը։-0-