ԵՄ ռազմական դիտորդների առաքելությունը դիտարկում է սկսել Վրաստանում

ԵՄ ռազմական դիտորդների առաքելությունը Երևանի ժամանակով 10։00-ին դիտարկում սկսեց Վրաստանում, հակամարտության գոտիների հետ սահմանակից տարածքներում, հաղորդում է ՌԻԱ Նովոստին՝ հղում անելով վրացական հեռուստաալիքներին։

Հեռուստաընկերության տեսանյութերի համաձայն, ԵՄ անզեն դիտորդներով զրահապատ ավտոշարասյուները շարժվեցին որոշակի երթուղիներով, որոնք նախապես չեն հրապարակվում։

Դիտորդները լքեցին Բազալեթիում (Թբիլիսիի մոտակաքում) և Գորիում տեղակայված իրենց բազաները։ Դիտորդների հետ ավտոշարասյունում գտնվում են հեռուստալրագրողներ, որոնց արգելված է դուրս գալ ավտոմեքենաներից և զրույցի բռնվել Հարավային Օսեթիայի և Աբխազիայի մոտ գտնվող այսպես կոչված «բուֆերային գոտիներում» գտնվող ռուս զինվորականների հետ։

Վրաստանում ընդհանուր առմամբ աշխատում է 350 ներկայացուցիչ՝ մոնիտորինգում ներգրավված ԵՄ 22 երկրներից։ Նրանցից 200-ը դիտորդներ  են, մնացածը առաքելության տեխնիկական անձնակազմն է։ Դիտորդները տեղափոխվում են հատուկ զրահապատ ավտոմեքենաներով։

Յուրաքանչյուր դիտորդ հագին ունի ԵՄ դրոշի գույնի հագուստ՝ կազմակերպության տարբերանշաններով։ Դիտորդների գործառույթների մեջ է մտնում զբաղեցրած տարածքների վերահսկումն ու պարեկությունը։

Վրաստանում ԵՄ առաքելության մանդատը ուժի մեջ է մինչև 2009թ. սեպտեմբերի 20-ը։ -0-