Հայկական մշակույթի «Բարի արագիլ» փառատոնը կբացվի Դոնի Ռոստովում

Հայկական մշակույթի «Բարի Արագիլ» առաջին միջազգային փառատոն-մրցույթը, որը կմիավորի երաժշտական կատարման, պարարվեստի և օրիգինալ ժանրի վիրտուոզներին, երեքշաբթի կբացվի Դոնի Ռոստովում, «ՌԻԱ Նովոստիին» հաղորդել է փառատոնի կազմակերպիչների  ներկայացուցիչը։

«Փառատոնը կբացվի երեքշաբթի երեկոյան գալա-համերգով, որին կմասնակցեն Հայաստանից ժամանած շատ հյուրեր, այդ թվում նաև հայտնի երգիչ Արամեն», - պատմել է գործակալության զրուցակիցը։

Նա նշել է, որ փառատոնի նպատակը Ռուսաստանում հայկական մշակույթի զարգացումն է և տարածումը, մշակութային ավանդույթների պահպանումն ու կատարելագործումը, ռուս-հայկական բարեկամական հարաբերությունների ամրապնդումն ու աջակցությունը, ինչպես նաև նոր տաղանդների հայտնաբերումը և ռուսական ու միջազգային փառատոններին ու մրցույթներին մասնակցելու համար տվյալների բազայի ձևավորումը։

Բացի վոկալ, պարային համարներից և գործիքային երաժշտությունից, ժյուրիի դատին կներկայացվեն օրիգինալ ժանրի համարներ՝ հումոր, նմանակումներ, մնջախաղ, կլոունադա, գեղարվեստական խոսք և նորաձևության թատրոն։ Վոկալ համարների պարտադիր պահանջներից մեկը երգերի հայերեն կատարումն է։

Մրցույթի ժյուրիի կազմում են Փարիզի, Երևանի, Մինսկի, Մոսկվայի, Տվերի, Տուլայի և Դոնի Ռոստովի մշակույթի և արվեստի առաջատար ներկայացուցիչներ, պրոֆեսիոնալ ռեժիսորներ, վոկալիստներ, պարուսույցներ։

Փառատոնի կազմակերպիչներն են Դոնի Նոր Նախիջևանի հայկական համայնքը, Մանկական և պատանեկան կազմակերպությունների Ռոստովի միությունն ու «Նոր Նախիջևան» երիտասարդական կազմակերպությունը։

Մրցույթն անցկացվում է Դաշնային Հարավային շրջանում ՌԴ նախագահի լիազոր ներկայացուցչի, Ռոստովի նահանգի ղեկավարության և Օրենսդիր ժողովի, Դոնի Ռոստովի քաղաքապետարանի և Մոսկվայի կառավարության աշխարհի մշակույթի «Ազգությունների մոսկվյան տուն» Մոսկվայի քաղաքային կենտրոնի, ինչպես նաև Մոսկվայի միջշրջանային կապերի և ազգային քաղաքականության կոմիտեի աջակցությամբ։-0-