Պետդումայի խոսնակ, «Յեդինայա Ռոսիա» կուսակցության ներկայիս նախագահ Բորիս Գրիզլովի փոխարեն կգլխավորի արդյոք ՌԴ նախագահ Վլադիմիր Պուտինը խորհրդարանի նույնանուն խմբակցությունը, պարզ կլինի կուսակցության իններորդ նիստի ժամանակ, որը տեղի կունենա Մոսկվայի Գոստինոյ դվորում՝ ապրիլի 14-15-ը։ Գրիզլովը ղեկավարում է կուսակցությունը 2002 թ.-ի նոյեմբերից։
Մայիսի սկզբին կավարտվի Պուտինի՝ ութ տարի տևած նախագահության ժամկետը։ Մարտի 2-ին ընտրված ՌԴ նախագահ Դմիտրի Մեդվեդևը դեռևս ընտրություններից առաջ առաջարկել է Պուտինին կառավարության ղեկավարի պաշտոնը՝ նրա հաղթանակի դեպքում։ Ընտրությունների ժամանակ Մեդվեդևը ստացել է ընտրողների ձայների ավելի քան 70 տոկոսը։ Մայիսի 6-ին Պետդումայի պատգամավորները կհաստատեն Պուտինի թեկնածությունը վարչապետի պաշտոնում, հաղորդում է «ՌԻԱ Նովոստին»։
Մեկ այլ առաջարկ՝ «Յեդինայա Ռոսիայի» շարքերն անցնելը Պուտինը ստացել է բազմաթիվ անգամ։ Այդ թվում նաև Պետդումայի ընտրություններից առաջ։ Այն ժամանակ նախագահն այդ առաջարկը չէր ընդունել, սակայն համաձայնվել էր գլխավորել ընտրություններին ներկայացված կուսակցության թեկնածուների դաշնային ցանկը։ Արդյունքում իշխանական կուսակցության օգտին քվեարկել է ռուսների 64,3 տոկոսը։ Այժմ կուսակցության անդամները կրկին ետ են կանչում Պուտինին և նիստի ժամանակ մտադիր են պաշտոնապես առաջարկել նախագահին ղեկավարել կուսակցությունը։
«Եթե Վլադիմիր Վլադիմիրովիչ Պուտինը գլխավորի «Յեդինայա Ռոսիան»՝ դա կլինի ամենալավ տարբերակը։ Եվ մենք դրա մասին ասում ենք վերջին չորս տարվա ընթացքում», - ասել է «Յեդինայա Ռոսիայի» ներկա առաջնորդ Բորիս Գրիզլովը։ «Յեդինիայա Ռոսիա» մուտք գործելու հրավեր է ստացել նաև Մեդվեդևը։
«Մենք միշտ հրավիրել ենք և հրավիրելու ենք կուսակցություն Վլադիմիր Պուտինին և Դմիտրի Մեդվեդևին», - ասել է Գրիզլովը լրագրողներին անցած հինգշաբթի՝ պատասխանելով «Յեդինայա Ռոսիա»՝ Պուտինի և Մեդվեդևի մուտք գործելու մասին հարցին։
Պուտինը կարող է գլխավորել կուսակցությունը՝ մուտք չգործելով նրա շարքերը։ Ինչպես գրում են ռուսական լրատվամիջոցները, դրա համար կուսակցության անդամները կանոնակարգում կարող են որոշ փոփոխություններ անել։
Այժմ կուսակցության կանոնակարգում ասված է, որ գերագույն խորհուրդ ընտրվում են այն անձինք, որոնք կուսակցության շարքերում են մեկ տարուց ոչ պակաս՝ «բացառությամբ այն անձանց, որոնց համար քաղաքական կուսակցության անդամ լինելու հնարավորությունը սահմանափակված է Ռուսաստանի Դաշնության օրենսդրությամբ»։
Մասնավորապես, ՌԴ արտակարգ իրավիճակների նախարարության (ԱԻՆ) ղեկավար Սերգեյ Շոյգուն, լինելով «Յեդինայա Ռոսիայի» գերագույն խորհրդի համանախագահ, չունի կուսակցական տոմս։
Կուսակցության նիստը տեղի կունենա Գոստինոյ դվորում՝ ինչպես և նախորդը։ Ինչպես տեղեկացրել է կուսակցության մամուլի ծառայությունը, սպասվում է շուրջ 600 պատվիրակ և ավելի քան 1500 հյուր։ Նիստի աշխատանքների լուսաբանման համար՝ հավատարմագրված է ավելի քան 800 ռուս և օտարերկրյա լրագրող։-0-
