Ռուսաստանը ներկայացնող զույգերը նվաճել են Գեղասահքի Եվրոպայի առաջնության արծաթե և բրոնզե մեդալները

Ռուսաստանը ներկայացնող սպորտային զույգերը նվաճել են Զագրեբ քաղաքում (Խորվաթիա) անցկացվող Գեղասահքի Եվրոպայի առաջնության արծաթե և բրոնզե մեդալները։

Նախօրեին սպորտային զույգերի մրցույթում խաղարկվել է առաջնության մրցանակների առաջին կոմպլեկտը։ Երկրորդ տարին անընդմեջ մայրցամաքի առաջնության ոսկե մեդալները նվաճում են Գերմանիան ներկայացնող գեղասահորդներ Ալյոնա Սավչենկոն և Ռոբին Շոլկովին, որոնք երկու օրերի ելույթից հետո հավաքել են 202,39 միավոր։

Նրանք մեծ տարբերությամբ առաջ են անցել երկրորդ տեղը զբաղեցրած Մարիա Մուխորտովա և Մաքսիմ Տրանկով զույգից (169,41) և Ռուսաստանը ներկայացնող մյուս՝ Յուկո Կավագուտի և Ալեքսանդր Սմիրնով զույգից (167,25)։

Ռուսաստանը ներկայացնող երկու զույգերը՝ Մուխորտովա/Տրանկով և Կավագուտի/Սմիրնով, առաջին անգամ են դարձել Եվրոպայի առաջնության մեդալակիրներ։

Եվրոպայի առաջնությանն առաջին անգամ հանդես եկած Ռուսաստանը ներկայացնող Արինա Ուշակովա և Սերգեյ Կարև զույգը զբաղեցրել է հինգերորդ հորիզոնականը։ Հինգշաբթի կորոշվեն տղամարդկանց առաջնության մրցանակակիրները։-0-