ԵՐԵՎԱՆ, 24 հունվարի. /Նովոստի-Արմենիա/. ՌԴ արդյունաբերության և էներգետիկայի նախարարությունը կառավարության քննարկմանն է ներկայացրել մինչև 2020 թ. էլեկտրոէներգետիկայի զարգացման գլխավոր սխեման, տեղեկացրել է ՌԴ արդյունաբերության և էներգետիկայի նախարար Վիկտոր Խրիստենկոն, հաղորդում է «ՌԻԱ Նովոստին»։
«Մենք փաստաթուղթը կառավարության քննարկմանն ենք ներկայացրել...Այնտեղ ոչ մի քաղաքականություն չկա, այդ պատճառով մոտ ժամանակներս գլխավոր սխեման կընդունվի», - ասել է Խրիստենկոն «Կոմերսանտ» թերթին տված հարցազրույցում։
Նախարարը երկրի հյուսիս-արևմուտքն անվանել է այդ պլանում ամենաշատ խնդիրներ ունեցողը։ «Հյուսիս-արևմտյան շրջանը ամենաշատ խնդիրներն ունի՝ մեկ պարզ պատճառով՝ դա գազային ենթակառուցվածքի վերջնակետն է։ Որպեսզի այնտեղ հասցվի գազի անհրաժեշտ ծավալ, պետք է աշխատանք իրականացնել ոչ միայն խողովակի վերջնական մասում, այլ համակարգի ողջ երկարությամբ։ Այս ամենը ոչ այնքան գումարային մեծ խնդիր է, որքան պետք է հաշվի առնել արդյունահանվող հզորությունների զարգացման գործոնը։ Որպեսզի այնպես չստացվի, որ հանքավայրերից մեկի դուրս բերումը և մյուսի գործարկումը հանգեցնի նրան, որ անհրաժեշտ լրացուցիչ տրանսպորտային հզորությունները վաղը դատարկ լինեն», - ասել է Խրիստենկոն։-0-
