Վրաստանի խորհրդարանական ընտրությունները տեղի կունենան, մոտավորապես, մայիսի սկզբին. խոսնակի պաշտոնակատար

Վրաստանի խորհրդարանական ընտրությունները տեղի կունենան, մոտավորապես, մայիսի սկզբին, ուրբաթ տեղի ունեցած բյուրոյի նիստի ժամանակ հայտարարել է խորհրդարանի խոսնակի պաշտոնակատար Միխայիլ Մաչավարիանին, հաղորդում է «ՌԻԱ Նովոստին»։

«Ըստ երևույթին, մենք կսկսենք խորհրդարանական ընտրությունների նախընտրական արշավը մարտի վերջին - ապրիլին, իսկ ընտրությունները տեղի կունենան մայիսին», - ասել է Մաչավարիանին։

Նրա խոսքերով, փետրվարին Վրաստանի օրենսդիրները պետք է ինտենսիվ աշխատեն, պատգամավորները պետք է քննարկեն և հաստատեն կայանալիք խորհրդարանական ընտրություններին առնչվող սահմանադրական փոփոխությունները։

Ինչպես «ՌԻԱ Նովոստիին» պարզաբանել են օրենսդիր մարմնի մամուլի ծառայությունից, ընտրությունների անցկացման ստույգ ամսաթվի սահմանման մասին վերջնական որոշումը կընդունի Միխայիլ Սահակաշվիլին՝ Վրաստանի նախագահի պաշտոնը ստանձնելուց հետո։

Այժմ, Վրաստանի Սահմանադրության համաձայն, խորհրդարանական ընտրությունները պետք է անցկացվեն 2008 թ. աշնանը, սակայն, հունվարի 5-ին տեղի ունեցած հանրաքվեի արդյունքում երկրի ղեկավարությունը որոշում է կայացրել ընտրություններն անցկացնել գարնանը։

Հանրաքվեի արդյունքների համաձայն, ընտրողների ավելի քան 60 տոկոսը կողմ են քվեարկել 2008 թ. գարնանը խորհրդարանական ընտրությունների անցկացմանը ։-0-