Վրաստանի մայրաքաղաք Թբիլիսիում ուրբաթ տեղի կունենա Վրաստանի ընտրված նախագահ Միխայիլ Սահակաշվիլու երդման արարողության գլխավոր փորձը, լրագրողներին տեղեկացրել են Թբիլիսիի քաղաքապետարանից։
Կեսօրին իրավապահ մարմինները կդադարեցնեն մայրաքաղաքի կենտրոնական պողոտաների տրանսպորտային հոսքը։ Այս պահին դեպի Ռուսթավելու պողոտա են շարժվում Վրաստանի Զինված ուժերի ստորաբաժանումները, որոնք կմասնակցեն հունվարի 20-ի երդման արարողության օրը տեղի ունենալիք ռազմական շքերթին, հաղորդում է «ՌԻԱ Նովոստին»։
Փորձին մասնակցելու են 2500 հետևազորայիններ, տասը միավոր БТР-80, յոթ «Դանա» հրետանային համակարգեր, վեց «Գրադ» հրետանային համակարգեր, 23 միավոր ռազմական տեխնիկա, չորս «Իրոկեզ» ուղղաթիռ, նույնքան «МИ-4» ուղղաթիռ, երեք «Л-39» ռազմական ինքնաթիռ և վեց «СУ-25»։ Փորձը ղեկավարելու է Ցամաքային զորքերի շտաբի պետ, մայոր Մամուկա Բալախաձեն։ Երդման արարողության օրը շքերթը կղեկավարի Վրաստանի ՊՆ ԶՈՒ Միացյալ շտաբերի պետ, գնդապետ Զազա Գոգավան։
Թբիլիսիի կենտրոնում փորձը կսկսվի տեղական ժամանակով ժամը 15։00-ին և կավարտվի ժամը 19։00-ին։
Ինչպես «ՌԻԱ Նովոստիին» տեղեկացրել են Վրաստանի նախագահի աշխատակազմից, Միխայիլ Սահակաշվիլու երդման արարողությանը մասնակցելու համար մեկօրյա այցով Թբիլիսի կժամանեն Էստոնիայի, Լատվիայի, Լիտվայի, Լեհաստանի և Ռումինիայի նախագահները։ Վրաստան կժամանեն նաև Հայաստանի, Ղազախստանի, Ուկրաինայի, Շվեդիայի, Ադրբեջանի, Թուրքիայի և Ռուսաստանի խորհրդարանների խոսնակները, ԱԳ նախարարներն ու վարչապետերը։ Թբիլիսի կժամանեն Ֆրանսիայի, Գերմանիայի և ԱՄՆ-ի կառավարությունների անդամները։ Երդման արարողությանը կմասնակցեն նաև ՆԱՏՕ-ի, ԵՄ-ի և ԵԱՀԿ-ի պատվիրակությունները։ Մեծ Բրիտանիայից կժամանի Հարավային Կովկասի երկրներում Մեծ Բրիտանիայի հատուկ ներկայացուցիչը։
Հաստատված ծրագրի համաձայն, երդման արարողությունը կտևի երկու օր։
