«ՌԻԱ Նովոստին» դարձել է «Ռունետի 100 ամենահիշատակված ապրանքանիշերի» վարկանիշային աղյուսակի առաջատարը

ԵՐԵՎԱՆ, 17 հունվարի./Նովոստի-Արմենիա/. «ՌԻԱ Նովոստի» գործակալությունը կրկին գլխավորել է «Ռունետի 100 ամենահիշատակված ապրանքանիշերի» ամենամյա վարկանիշը՝ հրապարակված համակարգային մոնիտորինգի առաջատար մատակարար Webscan Technologies ինտերնետային ընկերության կողմից։

«Վարկանիշ-2007-ը կազմվել է Webscan N&P օպերատիվ մոնիտորինգի համակարգից՝ 2007թ. հունվարի 1-ից դեկտեմբերի 31-ը ստացված տվյալների հիման վրա։ Ավելի քան 3200 առաջատար ապրանքանիշերի մասին հիշատակումներն ուսումնասիրվում էին ընդհանուր տեղեկատվական ուղղվածության ավելի քան 1700 ինտերնետ-ռեսուրսներում»,- ասվում է Webscan Technologies ընկերության պաշտոնական կայքում։

Ուշագրավ է այն, որ առաջատարների եռյակում փոփոխություններ չեն գրանցվել, միաժամանակ պահպանվել է ոչ միայն դրա մասնակիցների կազմը, այլև տեղաբաշխումը։ Ինչպես և անցյալ տարի, առաջատարը «ՌԻԱ Նովոստի» գործակալությունն է, երկրորդ տեղում «Ինտերֆաքս» գործակալությունն է, և առաջին եռյակը եզրափակում է «ԻՏԱՌ-ՏԱՍՍԸ»։ Նրանց հաջորդում են Regnum, Reuters և РБК գործակալությունները՝ չորրորդ, հինգերորդ և վեցերորդ տեղերում՝ համապատասխանաբար։ Բացի այդ, առաջին տասնյակի իններորդ տեղում ԶԼՄ-ների ևս մեկ ներկայացուցիչ է՝ «Պրայմ-ՏԱՍՍ» մեդիա-խումբը։

ԶԼՄ-ների շարքում վարկանիշի առաջատարներից են ոչ միայն տեղեկատվական գործակալությունները։ 12-րդ տեղը զբաղեցնում է «Էխո Մոսկվի» ռադիոկայանը, նրան հետևում է НТВ հեռուստաալիքը և «Վեդոմոստի» թերթը (13 և 14-րդ տեղերը, համապատասխանաբար), իսկ 16 և 18-րդ տեղերը զբաղեցնում են ևս երկու պարբերականներ՝ «Կոմերսանտ» և «Իզվեստիա»։ Հարկ է նշել, որ «Կոմսոմոլսկայա պրավդան» և «ՄԿ»-ն թեև չեն մտել առաջին քսանյակի մեջ, այնուամենայնիվ, անցյալ տարվա համեմատ, ավելի բարձր տեղեր են զբաղեցրել. «ՄԿ»-ն 78-րդ տեղից բարձրացել է 37-րդ տեղը, իսկ «Կոմսոմոլսկայա պրավդան»՝ 92-ից 58-ը։--0—