Հնարավոր է, որ Թուրքմենստանի քաղաքացիները բենզինը ստանան անվճար

ԵՐԵՎԱՆ, 12 հունվարի /Նովոստի-Արմենիա/. Հնարավոր է, որ ապագայում Թուրքմենստանի քաղաքացիները իրենց անհրաժեշտ բենզինի մի մասը ստանան անվճար։

Ինչպես հաղորդում է «ՌԻԱ Նովոստին»՝ հղում անելով տեղական լրատվամիջոցներին, նախարարների կաբինետի նիստի ժամանակ երկրի քաղաքացիներին բենզինի արտոնյալ տրամադրման մասին առաջարկն արել է   Վառելիքա-էներգետիկական համալիրի գծով փոխվարչապետ Տաչբերդի Տագիևը։

Ենթադրվում է, որ Թուրքմենստանի քաղաքացիները կարող են անվճար բենզին ստանալ որոշակի չափի շրջանակներում, իսկ դրա սահմաններից դուրս վառելիքը կվաճառվի շուկայական արժեքով։

Նախագահ Ղուրբանգուլի Բերդիմուխամեդովը, ընդհանուր առմամբ, հավանության է արժանացրել այդ առաջարկը՝ որպես բնակչության աջակցությանն ուղղված պետության սոցիալական քաղաքականության պահանջներին համապատասխանող առաջարկ։ Նախագահը հանձնարարել է Տագիևին «մշակել երկրի քաղաքացիներին բենզինի արտոնյալ բացթողման մասին առաջարկի փուլային իրականացման միջոցառումները՝ հաշվի առնելով բնակչության շահերը», - հաղորդում են լրատվամիջոցները։-0-